nazar se dur hai dil se qarib-tar hai koi

nazar se duur hai dil se qarīb-tar hai koī

to phir ye kaise kahūñ mujh se be-ḳhabar hai koī

ye ahd kaise karūñ tujh ko bhuul jā.ūñgā

kahāñ yaqīn dil-e-be-qarār par hai koī

bahut hasīn shab-e-intizār hai lekin

tumhī batāo ki is raat kī sahar hai koī

tire tasavvur-e-rangīñ meñ yuuñ nazar gum hai

maiñ ab vahāñ huuñ kise fursat-e-nazar hai koī

tirī talāsh meñ kyā jaane kis maqām pe huuñ

ki ab nigāh meñ manzil na rah-guzar hai koī

ye zindagī to koī zindagī nahīñ 'shabnam'

ye zindagī hai ki TuuTī huī sipar hai koī

nazar se dur hai dil se qarib-tar hai koi

to phir ye kaise kahun mujh se be-KHabar hai koi

ye ahd kaise karun tujh ko bhul jaunga

kahan yaqin dil-e-be-qarar par hai koi

bahut hasin shab-e-intizar hai lekin

tumhi batao ki is raat ki sahar hai koi

tere tasawwur-e-rangin mein yun nazar gum hai

main ab wahan hun kise fursat-e-nazar hai koi

teri talash mein kya jaane kis maqam pe hun

ki ab nigah mein manzil na rah-guzar hai koi

ye zindagi to koi zindagi nahin 'shabnam'

ye zindagi hai ki TuTi hui sipar hai koi