nazar se pine pilane ki raat aai hai

nazar se piine pilāne kī raat aa.ī hai

diloñ kī pyaas bujhāne kī raat aa.ī hai

ġhamoñ kā daur huā ḳhatm poñchh lo aañsū

hañso ki hañsne hañsāne kī raat aa.ī hai

tamām zindagī jo ban ke yādgār rahe

ik aisā jashn manāne kī raat aa.ī hai

falak ke chāñd sitāre haiñ sahme sahme se

naqāb ruḳh se uThāne kī raat aa.ī hai

javāñ javāñ haiñ nazāre hasīñ hasīñ hai samāñ

ki chāñdnī meñ nahāne kī raat aa.ī hai

añdhere ab na raheñge hamārī duniyā meñ

na.e charāġh jalāne kī raat aa.ī hai

fazā meñ aaj tarannum sā ghul rahā hai 'nasīm'

ġhazal ke sher sunāne kī raat aa.ī hai

nazar se pine pilane ki raat aai hai

dilon ki pyas bujhane ki raat aai hai

ghamon ka daur hua KHatm ponchh lo aansu

hanso ki hansne hansane ki raat aai hai

tamam zindagi jo ban ke yaadgar rahe

ek aisa jashn manane ki raat aai hai

falak ke chand sitare hain sahme sahme se

naqab ruKH se uThane ki raat aai hai

jawan jawan hain nazare hasin hasin hai saman

ki chandni mein nahane ki raat aai hai

andhere ab na rahenge hamari duniya mein

nae charagh jalane ki raat aai hai

faza mein aaj tarannum sa ghul raha hai 'nasim'

ghazal ke sher sunane ki raat aai hai