nazar tasawwur-e-hasti ko DhunDhti hai abhi

nazar tasavvur-e-hastī ko DhūñDhtī hai abhī

vo bāzgasht jo sahrā meñ gūñjtī hai abhī

na jaane kis ko sitāroñ se aisī nisbat hai

ki bujh ga.e haiñ diye phir bhī raushnī hai abhī

bhaTak rahī hai ḳhalāoñ kī vus'atoñ meñ abhī

vo ik sadā-e-qalandar jo an-kahī hai abhī

hazār shukr sajāyā hai maiñ ne guldasta

hazār shukr bahāroñ se dostī hai abhī

abhī to tark-e-ta'alluq kī rasm hai baaqī

ki guftugū bhī ishāroñ meñ ho rahī hai abhī

savāl ye hai sharāra na ban sakā sho'la

javāb ye hai ki jazbe meñ kuchh kamī hai abhī

kisī ke zikr se māhaul gungunāne lage

kisī kī yaad meñ is darja tāzgī hai abhī

nazar tasawwur-e-hasti ko DhunDhti hai abhi

wo bazgasht jo sahra mein gunjti hai abhi

na jaane kis ko sitaron se aisi nisbat hai

ki bujh gae hain diye phir bhi raushni hai abhi

bhaTak rahi hai KHalaon ki wus'aton mein abhi

wo ek sada-e-qalandar jo an-kahi hai abhi

hazar shukr sajaya hai main ne guldasta

hazar shukr bahaaron se dosti hai abhi

abhi to tark-e-ta'alluq ki rasm hai baqi

ki guftugu bhi ishaaron mein ho rahi hai abhi

sawal ye hai sharara na ban saka sho'la

jawab ye hai ki jazbe mein kuchh kami hai abhi

kisi ke zikr se mahaul gungunane lage

kisi ki yaad mein is darja tazgi hai abhi