nazar uTha ke jo dekha udhar koi bhi na tha

nazar uThā ke jo dekhā udhar koī bhī na thā

sulagtī dhuup kī sarhad pe ghar koī bhī na thā

har ek jism thā ik poster shu'ā'oñ kā

sulagte dasht meñ ThanDā shajar koī bhī na thā

chamakte din meñ to sab log saath the lekin

udaas shab meñ mirā ham-safar koī bhī na thā

har ek shahr meñ thā iztirāb kā aaseb

jahāñ sukūn ho aisā nagar koī bhī na thā

sabhī ko fann-e-jarāhat se vāqafiyyat thī

hamārī tarah vahāñ be-hunar koī bhī na thā

sab apne kamroñ meñ mastī kī niiñd so.e the

siyāh shab meñ sar rahguzar koī bhī na thā

jo talḳh shaam ke sāyoñ ko qatl kar detā

tamām-shahr meñ itnā niDar koī bhī na thā

mire zavāl kī sab ko thī aarzū 'as.ad'

mire kamāl se ḳhush-dil magar koī bhī na thā

nazar uTha ke jo dekha udhar koi bhi na tha

sulagti dhup ki sarhad pe ghar koi bhi na tha

har ek jism tha ek poster shu'a'on ka

sulagte dasht mein ThanDa shajar koi bhi na tha

chamakte din mein to sab log sath the lekin

udas shab mein mera ham-safar koi bhi na tha

har ek shahr mein tha iztirab ka aaseb

jahan sukun ho aisa nagar koi bhi na tha

sabhi ko fann-e-jarahat se waqafiyyat thi

hamari tarah wahan be-hunar koi bhi na tha

sab apne kamron mein masti ki nind soe the

siyah shab mein sar rahguzar koi bhi na tha

jo talKH sham ke sayon ko qatl kar deta

tamam-shahr mein itna niDar koi bhi na tha

mere zawal ki sab ko thi aarzu 'asad'

mere kamal se KHush-dil magar koi bhi na tha