nazm-e-mai-KHana pe aa jae na ilzam kahin

nazm-e-mai-ḳhāna pe aa jaa.e na ilzām kahīñ

aaj saaqī hai kahīñ rind kahīñ jaam kahīñ

ahl-e-ulfat bhī huā karte haiñ nākām kahīñ

un kā āġhāz kahīñ hotā hai anjām kahīñ

apnī barbādī-e-paiham kā nahīñ mujh ko malāl

Dar ye hai aap pe aa jaa.e na ilzām kahīñ

kaash itnā to koī ahl-e-havas se pūchhe

tum ko duniyā meñ mayassar bhī hai ārām kahīñ

phir na baaqī rahe duniyā meñ añdheroñ kā vajūd

aa ke parda jo uThā deñ vo sar-e-bām kahīñ

chāñd tāroñ meñ kahīñ kī hai tajallī kī talāsh

pattharoñ se bhī tarāshe ga.e asnām kahīñ

zindagī meñ na koī lutf rahegā baaqī

miT ga.ī 'dard' agar gardish-e-ayyām kahīñ

nazm-e-mai-KHana pe aa jae na ilzam kahin

aaj saqi hai kahin rind kahin jam kahin

ahl-e-ulfat bhi hua karte hain nakaam kahin

un ka aaghaz kahin hota hai anjam kahin

apni barbaadi-e-paiham ka nahin mujh ko malal

Dar ye hai aap pe aa jae na ilzam kahin

kash itna to koi ahl-e-hawas se puchhe

tum ko duniya mein mayassar bhi hai aaram kahin

phir na baqi rahe duniya mein andheron ka wajud

aa ke parda jo uTha den wo sar-e-baam kahin

chand taron mein kahin ki hai tajalli ki talash

pattharon se bhi tarashe gae asnam kahin

zindagi mein na koi lutf rahega baqi

miT gai 'dard' agar gardish-e-ayyam kahin