nazr-e-tauba hum karenge mai-parasti ek din

nazr-e-tauba ham kareñge mai-parastī ek din

DhūñDhtī rah jā.egī ye bazm-e-mastī ek din

ġham na kar ḳhushiyāñ na ā.eñgī to ġham aa jā.eñge

bas hī jā.egī kisī se dil kī bastī ek din

yuuñ guzārī ham ne to apnī do-roza zindagī

mai-parastī ek din kī fāqa-mastī ek din

husn kī ye garm-bāzārī rahegī tā-ba-kai

dekhnā ho jā.eñgī ye jins sastī ek din

apnī nādānī ye nāzāñ haiñ bahut ahl-e-ḳhirad

un ko le Dūbegī un kī ḳhud-parastī ek din

hai jabhī se be-ḳhudī badmast huuñ sarshār huuñ

un ke hāthoñ se piyā thā jām-e-mastī ek din

Thokareñ khātā rahegā toḌ kar baiThegā paañv

ḳhatm ho jā.egī terī sair-e-hastī ek din

bach ke jā.eñgī kahāñ hastī shikast-o-reḳht se

sar-bulandī ke muqaddar meñ hai pastī ek din

dekh zālim kī huā kartī nahīñ rassī darāz

āsmāñ rah jā.egī ye chīra-dastī ek din

miTte miTte saaf miT jā.eñge ye naqsh-o-nigār

ḳhud ayaañ ho kar rahegā rāz-e-hastī ek din

TūTne vaalā hai naata us se TūTegā zarūr

chhūTne vaalī hai 'ḳhushtar' bazm-e-hastī ek din

nazr-e-tauba hum karenge mai-parasti ek din

DhunDhti rah jaegi ye bazm-e-masti ek din

gham na kar KHushiyan na aaengi to gham aa jaenge

bas hi jaegi kisi se dil ki basti ek din

yun guzari hum ne to apni do-roza zindagi

mai-parasti ek din ki faqa-masti ek din

husn ki ye garm-bazari rahegi ta-ba-kai

dekhna ho jaengi ye jins sasti ek din

apni nadani ye nazan hain bahut ahl-e-KHirad

un ko le Dubegi un ki KHud-parasti ek din

hai jabhi se be-KHudi badmast hun sarshaar hun

un ke hathon se piya tha jam-e-masti ek din

Thokaren khata rahega toD kar baiThega panw

KHatm ho jaegi teri sair-e-hasti ek din

bach ke jaengi kahan hasti shikast-o-reKHt se

sar-bulandi ke muqaddar mein hai pasti ek din

dekh zalim ki hua karti nahin rassi daraaz

aasman rah jaegi ye chira-dasti ek din

miTte miTte saf miT jaenge ye naqsh-o-nigar

KHud ayan ho kar rahega raaz-e-hasti ek din

TuTne wala hai nata us se TuTega zarur

chhuTne wali hai 'KHushtar' bazm-e-hasti ek din