nazren bhi un se milti hain aapas mein ishaare hote hain

nazreñ bhī un se miltī haiñ aapas meñ ishāre hote haiñ

kal tak jo kisī ke ho nā sake vo aaj hamāre hote haiñ

allah re fareb-e-zauq-e-nazar aise bhī nazāre hote haiñ

jhaḌte haiñ sharāroñ se gul bhī gul meñ bhī sharāre hote haiñ

in halkī halkī maujoñ meñ Duubā hai safīna kyā kahiye

taqdīr kī bāteñ haiñ varna tinke bhī sahāre hote haiñ

ummīd sahāre kī un se ai Dūbne vaale tauba kar

ye sirf tamāshā.ī saare dariyā ke kināre hote haiñ

bīmār-e-shab-e-furqat kī hañsī āḳhir ye uḌā.eñge kab tak

hone de tabassum-rez agar ye chāñd sitāre hote haiñ

ye lāla-o-gul ye shams-o-qamar ye naqsh 'musavvir' ye manzar

ik sho.ala-e-tūr-e-sīnā ke ye saare sharāre hote haiñ

nazren bhi un se milti hain aapas mein ishaare hote hain

kal tak jo kisi ke ho na sake wo aaj hamare hote hain

allah re fareb-e-zauq-e-nazar aise bhi nazare hote hain

jhaDte hain shararon se gul bhi gul mein bhi sharare hote hain

in halki halki maujon mein Duba hai safina kya kahiye

taqdir ki baaten hain warna tinke bhi sahaare hote hain

ummid sahaare ki un se ai Dubne wale tauba kar

ye sirf tamashai sare dariya ke kinare hote hain

bimar-e-shab-e-furqat ki hansi aaKHir ye uDaenge kab tak

hone de tabassum-rez agar ye chand sitare hote hain

ye lala-o-gul ye shams-o-qamar ye naqsh 'musawwir' ye manzar

ek shoala-e-tur-e-sina ke ye sare sharare hote hain