ne fiqh na mantiq ne hikmat ka risala hai

ne fiqh na mantiq ne hikmat kā risāla hai

is fann-e-mohabbat kā nusḳha hī nirālā hai

ḳhatra hai mujhe ab to chup rahne se bhī apne

kyā hai ki na sozish hai vo aah na naala hai

dil hī na khule apnā to kījiye kyā varna

sabza hai gulistāñ hai gulzār hai laala hai

kyūñkar na samar laave shāḳh-e-mizha laḳht-e-dil

sau ḳhūn-e-jigar se maiñ is tiir ko paalā hai

hai dil meñ to vo lekin dikhlā.ī nahīñ detā

bāhar to añdherā hai aur ghar meñ ujālā hai

tājīl na kar ai dil aane to lagā hai vo

mil jā.egā bosa bhī kyā muñh kā nivāla hai

kaifiyyat-e-mai-ḳhāna bas dekh le ab kyā hai

saaqī hai na sahbā hai shīsha hai na pyāla hai

ye chaal agar hai to rahne kā nahīñ ab dil

be-tarah se us ne to kuchh paañv nikālā hai

tū hotā to kyā hotā kal naam tirā lete

gulshan meñ 'hasan' ko maiñ girne se sambhālā hai

ne fiqh na mantiq ne hikmat ka risala hai

is fann-e-mohabbat ka nusKHa hi nirala hai

KHatra hai mujhe ab to chup rahne se bhi apne

kya hai ki na sozish hai wo aah na nala hai

dil hi na khule apna to kijiye kya warna

sabza hai gulistan hai gulzar hai lala hai

kyunkar na samar lawe shaKH-e-mizha laKHt-e-dil

sau KHun-e-jigar se main is tir ko pala hai

hai dil mein to wo lekin dikhlai nahin deta

bahar to andhera hai aur ghar mein ujala hai

tajil na kar ai dil aane to laga hai wo

mil jaega bosa bhi kya munh ka niwala hai

kaifiyyat-e-mai-KHana bas dekh le ab kya hai

saqi hai na sahba hai shisha hai na pyala hai

ye chaal agar hai to rahne ka nahin ab dil

be-tarah se us ne to kuchh panw nikala hai

tu hota to kya hota kal nam tera lete

gulshan mein 'hasan' ko main girne se sambhaala hai