nigah-e-iltifat ab bad-guman malum hoti hai

nigāh-e-iltifāt ab bad-gumāñ mā'lūm hotī hai

mirī har baat duniyā ko girāñ mā'lūm hotī hai

taḌap uThte haiñ sajde raushnī mahsūs kartā huuñ

jabīñ merī qarīb-e-āstāñ mā'lūm hotī hai

qayāmat hai javānī ke dinoñ kā yaad aa jaanā

chaman kī sair bhī bār-e-garāñ mā'lūm hotī hai

ġham-o-andoh meñ ai kaash saarī zindagī guzre

yahī mujh ko hayāt-e-jāvidāñ mā'lūm hotī hai

tarī dil meñ nahīñ ab ḳhushk haiñ ashk-e-masarrat bhī

har ik ummīd gard-e-kārvāñ mā'lūm hotī hai

nihāñ haiñ un ke jalve aa.ina hairāñ hai qismat kā

nazar nā-āshnā-e-imtihāñ mā'lūm hotī hai

kisī zarre ne mahfil ke koī karvaT nahīñ badlī

abhī be-kaif merī dāstāñ mā'lūm hotī hai

nazar jalvoñ pe hai aur kuchh nazar aatā nahīñ ham ko

koī to chiiz hai jo darmiyāñ mā'lūm hotī hai

jo dil ke raaz the kyūñkar hue ā.īna duniyā par

zabān-e-vaqt terī hī zabāñ mā'lūm hotī hai

zabān-e-hāl se jab vaqt kī bedād suntā huuñ

mujhe to 'shauq' apnī dāstāñ mā'lūm hotī hai

nigah-e-iltifat ab bad-guman ma'lum hoti hai

meri har baat duniya ko giran ma'lum hoti hai

taDap uThte hain sajde raushni mahsus karta hun

jabin meri qarib-e-astan ma'lum hoti hai

qayamat hai jawani ke dinon ka yaad aa jaana

chaman ki sair bhi bar-e-garan ma'lum hoti hai

gham-o-andoh mein ai kash sari zindagi guzre

yahi mujh ko hayat-e-jawidan ma'lum hoti hai

tari dil mein nahin ab KHushk hain ashk-e-masarrat bhi

har ek ummid gard-e-karwan ma'lum hoti hai

nihan hain un ke jalwe aaina hairan hai qismat ka

nazar na-ashna-e-imtihan ma'lum hoti hai

kisi zarre ne mahfil ke koi karwaT nahin badli

abhi be-kaif meri dastan ma'lum hoti hai

nazar jalwon pe hai aur kuchh nazar aata nahin hum ko

koi to chiz hai jo darmiyan ma'lum hoti hai

jo dil ke raaz the kyunkar hue aaina duniya par

zaban-e-waqt teri hi zaban ma'lum hoti hai

zaban-e-haal se jab waqt ki bedad sunta hun

mujhe to 'shauq' apni dastan ma'lum hoti hai