نگاہ عشق اٹھ گئی جدھر جدھر جہاں جہاں

نگاہ عشق اٹھ گئی جدھر جدھر جہاں جہاں

حریم حسن بے حجاب ادھر ادھر وہاں وہاں

خود اپنی ہی تجلیوں میں مل گیا نشان حق

بھٹکتی جانے یہ نظر کدھر کدھر کہاں کہاں

چراغ بن کے ظلمتوں کو نور میں بدل گیا

مرا وجود ضو فشاں سحر سحر اذاں اذاں

میں رنگ رنگ روپ روپ چھاؤں چھاؤں دھوپ دھوپ

میں بام و در مکاں مکاں اثر اثر زماں زماں

سکوں کہاں ہے قلب کو فراق ہو کہ وصل ہو

جگر جگر تپاں تپاں نظر نظر دھواں دھواں

ز فرق تا قدم ستم قیامتی ہی دم بدم

وہ ابرو و مژہ بہم تبر تبر سناں سناں

ندی کی طرح چڑھ کے کیوں جوانیاں اتر گئیں

فسانۂ حیات بھی خبر خبر گماں گماں

چمن چمن تھا نغمہ زن طرب نوائے انجمن

یہ آج کیا ہوا جو ہے بشر بشر فغاں فغاں

ازل سے جو نصیب ہے وہ ہر نفس قریب ہے

ہوس پھرا رہی ہے کیوں ڈگر ڈگر کشاں کشاں

ہے رستخیز عشق خود سراغ منزل ابد

خرد کی حیلہ جوئی میں خطر خطر عیاں عیاں

میں برقؔ کج کلاہ ہوں فقیر خانقاہ ہوں

پکارتے ہیں کیوں مجھے کھنڈر کھنڈر نشاں نشاں