nigah-e-lutf se teri kahin jo hum milte

nigāh-e-lutf se terī kahīñ jo ham milte

hamārī ziist ke shām-o-sahar baham milte

hameñ fareb-e-ḳhirad ne Dubo diyā varna

hamāre jaam se ḳhud aa ke jām-e-jam milte

kisī ke dard pe hañsnā kisī ke ġham meñ ḳhushī

ye lamhe kaash zamāne ko kam se kam milte

na hote ham to zamāne kī āgahī kī qasam

na lauh miltī na tum ko kahīñ qalam milte

sar-e-niyāz kī azmat ke raaz jab khulte

dar-e-butāñ se nishān-e-dar-e-haram milte

tamām-umr gañvā dī talāsh meñ lekin

ḳhudā na miltā na miltā kahīñ sanam milte

kalām-e-'asar' kī arzish nahīñ zamāne meñ

kahīñ jo hotī to halke se kuchh varam milte

nigah-e-lutf se teri kahin jo hum milte

hamari zist ke sham-o-sahar baham milte

hamein fareb-e-KHirad ne Dubo diya warna

hamare jam se KHud aa ke jam-e-jam milte

kisi ke dard pe hansna kisi ke gham mein KHushi

ye lamhe kash zamane ko kam se kam milte

na hote hum to zamane ki aagahi ki qasam

na lauh milti na tum ko kahin qalam milte

sar-e-niyaz ki azmat ke raaz jab khulte

dar-e-butan se nishan-e-dar-e-haram milte

tamam-umr ganwa di talash mein lekin

KHuda na milta na milta kahin sanam milte

kalam-e-'asar' ki arzish nahin zamane mein

kahin jo hoti to halke se kuchh waram milte