nigah-e-mast-e-saqi ka ishaara pa ke pita hun

nigāh-e-mast-e-sāqī kā ishāra pā ke piitā huuñ

hudūd-e-hosh kī manzil se bāhar jā ke piitā huuñ

ghaTā.eñ jhuum kar aatī haiñ jab maiḳhāne kī jānib

maiñ apnī ḳhūbī-e-taqdīr par itrā ke piitā huuñ

dar-e-pīr-e-muġhāñ se izn-e-bāda 'aam hote hī

tabī'at mast ho jaatī hai maiñ lahrā ke piitā huuñ

bahar-ālam hai ehsās-e-ḳhatā ummīd-e-rahmat par

kabhī ghabrā ke piitā huuñ kabhī sharmā ke piitā huuñ

'amīr'-e-dehlavī mai-ḳhāna-e-'ġhālib' se maiñ aksar

sharāb-e-fan ḳhum-e-she'r-o-suḳhan meñ lā ke piitā huuñ

nigah-e-mast-e-saqi ka ishaara pa ke pita hun

hudud-e-hosh ki manzil se bahar ja ke pita hun

ghaTaen jhum kar aati hain jab maiKHane ki jaanib

main apni KHubi-e-taqdir par itra ke pita hun

dar-e-pir-e-mughan se izn-e-baada 'am hote hi

tabi'at mast ho jati hai main lahra ke pita hun

bahar-alam hai ehsas-e-KHata ummid-e-rahmat par

kabhi ghabra ke pita hun kabhi sharma ke pita hun

'amir'-e-dehlawi mai-KHana-e-'ghaalib' se main aksar

sharab-e-fan KHum-e-she'r-o-suKHan mein la ke pita hun