nigah-e-muKHtasar se dastan tak baat ja pahunchi

nigāh-e-muḳhtasar se dāstāñ tak baat jā pahuñchī

ḳhudā jaane kahāñ se ab kahāñ tak baat jā pahuñchī

nigāhoñ kī zabāñ ne kah diyā jo kuchh na kahnā thā

dil-e-sozāñ se jab ashk-e-ravāñ tak baat jā pahuñchī

sañvar uTThī hai kyā zulf-e-zamīñ ab dast-e-insāñ se

ki māh-o-mushtarī-o-āsmāñ tak baat jā pahuñchī

huā to faisla dil kā ishāroñ meñ kunā.eñ meñ

kahāñ vo lutf jab lafz-e-bayāñ tak baat jā pahuñchī

balā se sāz-e-dil TuuTe sadā lekin na paidā ho

huī rusvā mohabbat jab fuġhāñ tak baat jā pahuñchī

ga.ī shāyad javānī aur gayā andāz-e-jur.at bhī

ki ab andesha-e-sūd ziyāñ tak baat jā pahuñchī

kabhī gulshan meñ apnā bhī nasheman thā chaman vaalo

ḳhudā jaane ye kyoñ barq-e-tapāñ tak baat jā pahuñchī

nazar be-bāk dil bebāk kyā parvā 'habīb' us kī

yahāñ tak baat jā pahuñchī vahāñ tak baat jā pahuñchī

nigah-e-muKHtasar se dastan tak baat ja pahunchi

KHuda jaane kahan se ab kahan tak baat ja pahunchi

nigahon ki zaban ne kah diya jo kuchh na kahna tha

dil-e-sozan se jab ashk-e-rawan tak baat ja pahunchi

sanwar uTThi hai kya zulf-e-zamin ab dast-e-insan se

ki mah-o-mushtari-o-asman tak baat ja pahunchi

hua to faisla dil ka ishaaron mein kunaen mein

kahan wo lutf jab lafz-e-bayan tak baat ja pahunchi

bala se saz-e-dil TuTe sada lekin na paida ho

hui ruswa mohabbat jab fughan tak baat ja pahunchi

gai shayad jawani aur gaya andaz-e-jurat bhi

ki ab andesha-e-sud ziyan tak baat ja pahunchi

kabhi gulshan mein apna bhi nasheman tha chaman walo

KHuda jaane ye kyon barq-e-tapan tak baat ja pahunchi

nazar be-bak dil bebak kya parwa 'habib' us ki

yahan tak baat ja pahunchi wahan tak baat ja pahunchi