nigah-e-naz se barbaadi-e-dil dekhne wale

nigāh-e-nāz se barbādī-e-dil dekhne vaale

mujhe bhī dekh o ulfat kā hāsil dekhne vaale

nazar aa jā kabhī ā.īna-e-dil dekhne vaale

mirī hastī meñ apnā husn-e-kāmil dekhne vaale

kabhī to shoḳhī-e-mashq-e-sitam kī intihā hogī

kabhī to daad deñge hasrat-e-dil dekhne vaale

ḳhamoshī par na jā ek ik nafas labrez-e-mātam hai

ġham-e-dil bhī to dekh o rāhat-e-dil dekhne vaale

ma.āl-e-justajū hai ik nashāt-e-zauq-e-nākāmī

na hañs o hāsil-e-tahsīl-e-hāsil dekhne vaale

mirī betābiyāñ lene na deñgī chain tujh ko bhī

maze le le ke o betābī-e-dil dekhne vaale

harīf-e-lazzat-e-zauq-e-fanā ahl-e-havas kyā hoñ

na hoñge āshnā-e-bahr sāhil dekhne vaale

sahar-dam ḳhāk-e-parvāna pe haiñ kuchh sham.a ke aañsū

vo mahfil hai na ab vo rang-e-mahfil dekhne vaale

jinheñ jaanā thā kab ke manzil-e-maqsūd tak pahoñche

rahe chakkar meñ buad-o-qurb-e-manzil dekhne vaale

rahā kyā ḳhaak baaqī ab hai jis kī justujū tujh ko

jalā kar dil ko o ḳhākistar-e-dil dekhne vaale

tujhe ma.alūm kyā tūfānoñ meñ kyā kyā guzartī hai

tamāshā-e-fazā-e-mauj-o-sāhil dekhne vaale

mirī afsurdagī ā.īna-e-bedād-e-qātil hai

mujhe dekheñ bahār-e-husn-e-qātil dekhne vaale

jo honā thā huā ab is pashemānī se kyā hāsil

nigāh-e-yās se o sū-e-bismil dekhne vaale

qafas se āshiyāñ tak raqs meñ haiñ bijliyāñ 'farruḳh'

kidhar jā.eñge chhuT kar ḳhvāb-e-manzil dekhne vaale

nigah-e-naz se barbaadi-e-dil dekhne wale

mujhe bhi dekh o ulfat ka hasil dekhne wale

nazar aa ja kabhi aaina-e-dil dekhne wale

meri hasti mein apna husn-e-kaamil dekhne wale

kabhi to shoKHi-e-mashq-e-sitam ki intiha hogi

kabhi to dad denge hasrat-e-dil dekhne wale

KHamoshi par na ja ek ek nafas labrez-e-matam hai

gham-e-dil bhi to dekh o rahat-e-dil dekhne wale

maal-e-justaju hai ek nashat-e-zauq-e-nakaami

na hans o hasil-e-tahsil-e-hasil dekhne wale

meri betabiyan lene na dengi chain tujh ko bhi

maze le le ke o betabi-e-dil dekhne wale

harif-e-lazzat-e-zauq-e-fana ahl-e-hawas kya hon

na honge aashna-e-bahr sahil dekhne wale

sahar-dam KHak-e-parwana pe hain kuchh shama ke aansu

wo mahfil hai na ab wo rang-e-mahfil dekhne wale

jinhen jaana tha kab ke manzil-e-maqsud tak pahonche

rahe chakkar mein buad-o-qurb-e-manzil dekhne wale

raha kya KHak baqi ab hai jis ki justuju tujh ko

jala kar dil ko o KHakistar-e-dil dekhne wale

tujhe malum kya tufanon mein kya kya guzarti hai

tamasha-e-faza-e-mauj-o-sahil dekhne wale

meri afsurdagi aaina-e-bedad-e-qatil hai

mujhe dekhen bahaar-e-husn-e-qatil dekhne wale

jo hona tha hua ab is pashemani se kya hasil

nigah-e-yas se o su-e-bismil dekhne wale

qafas se aashiyan tak raqs mein hain bijliyan 'farruKH'

kidhar jaenge chhuT kar KHwab-e-manzil dekhne wale