nigah-e-naz se bijli gira ke dekho to

nigāh-e-nāz se bijlī girā ke dekho to

hamārā zarf kabhī aazmā ke dekho to

jo ban paḌe to uThāo naqāb-e-rū-e-hayāt

ruḳh-e-nigār se parda haTā ke dekho to

na aao tum mire ghar kī taraf pe ye to karo

milo jo raah meñ nazreñ bachā ke dekho to

giro na ahl-e-vafā kī nazar se tab jāneñ

nazar se apnī hameñ tum girā ke dekho to

faqat haiñ kahne kī bāteñ haqīqat aur majāz

na jhāñko aa.ine meñ paas aa ke dekho to

piyo to ritl-e-girāñ vā.iz-e-karam-farmā

kisī kī aañkh se Tuk Dagmagā ke dekho to

varaq varaq hai chaman-zār-e-harf-e-rāz magar

naqāb-e-āriz-e-ma.anī uThā ke dekho to

nahīñ haiñ vaqt ki rūTheñ to phir vo man na sakeñ

hazār baar manāo manā ke dekho to

vo kahte haiñ ki lagāvaT nahīñ unheñ 'naqvī'

zarā tum un kī taraf muskurā ke dekho to

nigah-e-naz se bijli gira ke dekho to

hamara zarf kabhi aazma ke dekho to

jo ban paDe to uThao naqab-e-ru-e-hayat

ruKH-e-nigar se parda haTa ke dekho to

na aao tum mere ghar ki taraf pe ye to karo

milo jo rah mein nazren bacha ke dekho to

giro na ahl-e-wafa ki nazar se tab jaanen

nazar se apni hamein tum gira ke dekho to

faqat hain kahne ki baaten haqiqat aur majaz

na jhanko aaine mein pas aa ke dekho to

piyo to ritl-e-giran waiz-e-karam-farma

kisi ki aankh se Tuk Dagmaga ke dekho to

waraq waraq hai chaman-zar-e-harf-e-raaz magar

naqab-e-ariz-e-mani uTha ke dekho to

nahin hain waqt ki ruThen to phir wo man na saken

hazar bar manao mana ke dekho to

wo kahte hain ki lagawaT nahin unhen 'naqwi'

zara tum un ki taraf muskura ke dekho to