nigah-e-naz teri jab se karsaz nahin

nigāh-e-nāz tirī jab se kārsāz nahīñ

jigar meñ dard nahīñ qalb meñ gudāz nahīñ

nafas nahīñ koī aisā ki jāñ-gudāz nahīñ

ye merā ishq hai zāhid tirī namāz nahīñ

jise farishtoñ se qudrat chhupā ke rakhtī hai

sharāb-ḳhāne meñ vo raaz koī raaz nahīñ

havas kī zindagī-e-jāvedāñ pe la.anat hai

balā se umr-e-mohabbat agar darāz nahīñ

ta.alluqāt mohabbat kī jaan hotī hai

vo ik nigāh ba-zāhir jo dil-navāz nahīñ

tirī jafāoñ pe hai naaz jis qadar mujh ko

mujhe vafāoñ pe bhī apnī itnā naaz nahīñ

agar kisī kī mohabbat meñ koī raaz na ho

to phir kisī kī mohabbat to koī raaz nahīñ

nigah bhī jurm kabhī jurm-e-be-nigāhī bhī

kisī usuul pe vo jalva-gāh-e-nāz nahīñ

maiñ be-niyāz sahī tum se bhī mohabbat maiñ

magar tumhārī mohabbat se be-niyāz nahīñ

tum apne husn kī khā kar qasam mukar jaao

agar tumhārī mohabbat ko mujh pe naaz nahīñ

kal un ke jalvoñ pe thā merā iḳhtiyār-e-nazar

aur aaj apnī nazar kā bhī meñ majāz nahīñ

nigāh-e-nāz ke allāh re ye ġhalat andāz

koī ye samjhe abhī un ko mashq-e-nāz nahīñ

sunā.ī detī hai mahsūs jān-o-dil ho kar

vo ik sadā jo hanūz āshnā-e-sāz nahīñ

tumhārī bazm kī ye dost-dāriyāñ tauba

kisī se jaise kisī ko kuchh ehtirāz nahīñ

khulā huā hai vo bāb-e-qubūl-e-mai-ḳhāna

agar nahīñ dar-e-tauba balā se baaz nahīñ

tirī adā-e-taġhāful kī jaan se zālim

vo ik adā tirī jis par tujhe bhī naaz nahīñ

ab apne jalvoñ kā lillāh ehtirām muaaf

nigāh-e-shauq ko ab tāb-e-imtiyāz nahīñ

dobāra kis se milī ishq kī nigāh-e-garm

zamāna-soz hai 'bismil' zamāna-sāz nahīñ

nigah-e-naz teri jab se karsaz nahin

jigar mein dard nahin qalb mein gudaz nahin

nafas nahin koi aisa ki jaan-gudaz nahin

ye mera ishq hai zahid teri namaz nahin

jise farishton se qudrat chhupa ke rakhti hai

sharab-KHane mein wo raaz koi raaz nahin

hawas ki zindagi-e-jawedan pe lanat hai

bala se umr-e-mohabbat agar daraaz nahin

talluqat mohabbat ki jaan hoti hai

wo ek nigah ba-zahir jo dil-nawaz nahin

teri jafaon pe hai naz jis qadar mujh ko

mujhe wafaon pe bhi apni itna naz nahin

agar kisi ki mohabbat mein koi raaz na ho

to phir kisi ki mohabbat to koi raaz nahin

nigah bhi jurm kabhi jurm-e-be-nigahi bhi

kisi usul pe wo jalwa-gah-e-naz nahin

main be-niyaz sahi tum se bhi mohabbat main

magar tumhaari mohabbat se be-niyaz nahin

tum apne husn ki kha kar qasam mukar jao

agar tumhaari mohabbat ko mujh pe naz nahin

kal un ke jalwon pe tha mera iKHtiyar-e-nazar

aur aaj apni nazar ka bhi mein majaz nahin

nigah-e-naz ke allah re ye ghalat andaz

koi ye samjhe abhi un ko mashq-e-naz nahin

sunai deti hai mahsus jaan-o-dil ho kar

wo ek sada jo hanuz aashna-e-saz nahin

tumhaari bazm ki ye dost-dariyan tauba

kisi se jaise kisi ko kuchh ehtiraaz nahin

khula hua hai wo bab-e-qubul-e-mai-KHana

agar nahin dar-e-tauba bala se baz nahin

teri ada-e-taghaful ki jaan se zalim

wo ek ada teri jis par tujhe bhi naz nahin

ab apne jalwon ka lillah ehtiram muaf

nigah-e-shauq ko ab tab-e-imtiyaz nahin

dobara kis se mili ishq ki nigah-e-garm

zamana-soz hai 'bismil' zamana-saz nahin