nigah-e-sharmagin sahr-afrin malum hoti hai

nigāh-e-sharmagīñ sahr-āfrīñ ma.alūm hotī hai

ye dushman hai magar dushman nahīñ ma.alūm hotī hai

mo.attar hai mashām-e-jāñ bahār-e-husn-e-rangīñ se

khulī phir aaj zulf-e-ambarīñ ma.alūm hotī hai

kahīñ hairat meñ nargis hai kahīñ gul chāk-dāman hai

mohabbat kī fazā kitnī hasīñ ma.alūm hotī hai

uḌaa.ī ḳhaak maiñ ne is qadar kū-e-mohabbat kī

ki apne sar pe bhī mujh ko zamīñ ma.alūm hotī hai

ḳhalish-hā-e-tamanna kī shikāyat kyā dil-e-nādāñ

mohabbat meñ musībat bhī kahīñ ma.alūm hotī hai

ḳhudā jaane chaman meñ aaj kyā guzrī nasheman par

pareshāñ ḳhud-baḳhud jān-e-hazīñ ma.alūm hotī hai

ye aakar dil meñ phir dil se nahīñ miTtī nahīñ jaatī

hasīnoñ kī tamanna bhī hasīñ ma.alūm hotī hai

bahār-e-gulshan-e-hastī pe kyoñ nāzāñ hai ai gulchīñ

chhupī shāyad ḳhizāñ is meñ nahīñ ma.alūm hotī hai

'vafā' ho yā jafā ho kuchh nahīñ is se ġharaz mujh ko

kisī kī har adā dil ko hasīñ ma.alūm hotī hai

nigah-e-sharmagin sahr-afrin malum hoti hai

ye dushman hai magar dushman nahin malum hoti hai

moattar hai masham-e-jaan bahaar-e-husn-e-rangin se

khuli phir aaj zulf-e-ambarin malum hoti hai

kahin hairat mein nargis hai kahin gul chaak-daman hai

mohabbat ki faza kitni hasin malum hoti hai

uDai KHak main ne is qadar ku-e-mohabbat ki

ki apne sar pe bhi mujh ko zamin malum hoti hai

KHalish-ha-e-tamanna ki shikayat kya dil-e-nadan

mohabbat mein musibat bhi kahin malum hoti hai

KHuda jaane chaman mein aaj kya guzri nasheman par

pareshan KHud-baKHud jaan-e-hazin malum hoti hai

ye aakar dil mein phir dil se nahin miTti nahin jati

hasinon ki tamanna bhi hasin malum hoti hai

bahaar-e-gulshan-e-hasti pe kyon nazan hai ai gulchin

chhupi shayad KHizan is mein nahin malum hoti hai

'wafa' ho ya jafa ho kuchh nahin is se gharaz mujh ko

kisi ki har ada dil ko hasin malum hoti hai