nigah-e-shauq mein KHwabon ka ek samundar tha

nigāh-e-shauq meñ ḳhvāboñ kā ik samundar thā

khulī jo aañkh to maiñ hādse kī zad par thā

tamām umr maiñ bāhar talāsh karne se

ḳhud apnī zaat meñ maiñ jhāñktā to behtar thā

salīb par use kis jurm meñ chaḌhāyā gayā

vo ek shaḳhs jo rahbar thā na payambar thā

kisī bhī jang meñ us ne nahīñ fat.h paa.ī

ye aur baat ki vo vaqt kā sikandar thā

jagā sakī na kisī ko hamārī chīḳh kabhī

hamāre ahd kā har shaḳhs goyā patthar thā

tamām umr mirī ḳhauf meñ kaTī 'naqvī'

jahāñ qiyām thā merā vo kāñch kā ghar thā

nigah-e-shauq mein KHwabon ka ek samundar tha

khuli jo aankh to main hadse ki zad par tha

tamam umr main bahar talash karne se

KHud apni zat mein main jhankta to behtar tha

salib par use kis jurm mein chaDhaya gaya

wo ek shaKHs jo rahbar tha na payambar tha

kisi bhi jang mein us ne nahin fath pai

ye aur baat ki wo waqt ka sikandar tha

jaga saki na kisi ko hamari chiKH kabhi

hamare ahd ka har shaKHs goya patthar tha

tamam umr meri KHauf mein kaTi 'naqwi'

jahan qiyam tha mera wo kanch ka ghar tha