nigah-e-shauq mein yun zulf ke sab pech-o-KHam Dube

nigāh-e-shauq meñ yuuñ zulf ke sab pech-o-ḳham Duube

aqīdat kī nadī meñ jaise patthar ke sanam Duube

hue alfāz gūñge ho ga.iiñ sab harkateñ mub.ham

ki jab apne lahū meñ apne hī lauh-o-qalam Duube

hazāroñ nafsiyātī rang ubhar aa.e ki jab dekhā

ḳhushī kī ik pyālī meñ pahāḌoñ jaise ġham Duube

mohabbat kā samundar to bulātā hī rahā lekin

rahe donoñ kināre par na tum Duube na ham Duube

Dubonā Dūbnā hai rāhat-e-jāñ khul gayā uqda

jo pahle pahl us ke nainoñ meñ us ke balam Duube

tujhe kaise batā.ūñ ai ġhazāla terī āñkhoñ meñ

bahut Duube mire armān lekin phir bhī kam Duube

raqīb apne se thiiñ aThkheliyāñ girdāb kī aisī

agar ubhrā to vo ubhrā agar Duube to ham Duube

laboñ ke sāhiloñ par naam us kā likh ke rakhiyegā

kahīñ aisā na ho ki apne mohsin kā karam Duube

na gangā-jal meñ hī Duube na Duube āb-e-kausar meñ

magar ashkoñ ke sāgar meñ sabhī dair-o-haram Duube

tire alfāz 'panchhī' terī kashtī ke musāfir the

talāsh-e-jazba-e-tausīf meñ jo dam-ba-dam Duube

nigah-e-shauq mein yun zulf ke sab pech-o-KHam Dube

aqidat ki nadi mein jaise patthar ke sanam Dube

hue alfaz gunge ho gain sab harkaten mubham

ki jab apne lahu mein apne hi lauh-o-qalam Dube

hazaron nafsiyati rang ubhar aae ki jab dekha

KHushi ki ek pyali mein pahaDon jaise gham Dube

mohabbat ka samundar to bulata hi raha lekin

rahe donon kinare par na tum Dube na hum Dube

Dubona Dubna hai rahat-e-jaan khul gaya uqda

jo pahle pahl us ke nainon mein us ke balam Dube

tujhe kaise bataun ai ghazala teri aankhon mein

bahut Dube mere arman lekin phir bhi kam Dube

raqib apne se thin aThkheliyan girdab ki aisi

agar ubhra to wo ubhra agar Dube to hum Dube

labon ke sahilon par nam us ka likh ke rakhiyega

kahin aisa na ho ki apne mohsin ka karam Dube

na ganga-jal mein hi Dube na Dube aab-e-kausar mein

magar ashkon ke sagar mein sabhi dair-o-haram Dube

tere alfaz 'panchhi' teri kashti ke musafir the

talash-e-jazba-e-tausif mein jo dam-ba-dam Dube