nigah-e-shauq waqf-e-husn-e-fitrat hoti jati hai

nigāh-e-shauq vaqf-e-husn-e-fitrat hotī jaatī hai

tabī.at mahram-e-rāz-e-mohabbat hotī jaatī hai

numāyāñ shoḳhī-e-rañg-e-tabī.at hotī jaatī hai

ki har kāfir adā se ab mohabbat hotī jaatī hai

mohabbat aah kyā shai hai mohabbat kyā kahūñ tum se

mujhe ma.alūm dil kī qadr-o-qīmat hotī jaatī hai

mirā zauq-e-parastish hai judā saare zamāne se

mohabbat kartā jaatā huuñ ibādat hotī jaatī hai

maiñ jitnā ġhaur kartā huuñ nizām-e-bazm-e-hastī par

isī nisbat se zāhir ab haqīqat hotī jaatī hai

jafā-e-charḳh kaj-buniyād ko rāhat samajhtā huuñ

dalīl-e-rāh-e-irfāñ har musībat hotī jaatī hai

qayāmat hai ki arbāb-e-mohabbat uThte jaate haiñ

nazar vāloñ se ḳhālī bazm-e-fitrat hotī jaatī hai

vatan vāloñ se koī kaash kah de 'rāz' ye jā kar

bahār-e-zindagānī nazr-e-ġhurbat hotī jaatī hai

nigah-e-shauq waqf-e-husn-e-fitrat hoti jati hai

tabiat mahram-e-raaz-e-mohabbat hoti jati hai

numayan shoKHi-e-rang-e-tabiat hoti jati hai

ki har kafir ada se ab mohabbat hoti jati hai

mohabbat aah kya shai hai mohabbat kya kahun tum se

mujhe malum dil ki qadr-o-qimat hoti jati hai

mera zauq-e-parastish hai juda sare zamane se

mohabbat karta jata hun ibaadat hoti jati hai

main jitna ghaur karta hun nizam-e-bazm-e-hasti par

isi nisbat se zahir ab haqiqat hoti jati hai

jafa-e-charKH kaj-buniyaad ko rahat samajhta hun

dalil-e-rah-e-irfan har musibat hoti jati hai

qayamat hai ki arbab-e-mohabbat uThte jate hain

nazar walon se KHali bazm-e-fitrat hoti jati hai

watan walon se koi kash kah de 'raaz' ye ja kar

bahaar-e-zindagani nazr-e-ghurbat hoti jati hai