نگاہ شوخ سے جب شوق کا پیغام آتا ہے

نگاہ شوخ سے جب شوق کا پیغام آتا ہے

ہمیں اس دم خیال گردش ایام آتا ہے

وہی اک وقت ہوتا ہے جو اپنے کام آتا ہے

کبھی برسوں میں جب دور بہار جام آتا ہے

کہاں آرام رکھا ہے کہاں آرام آتا ہے

گزر جاتی ہے صبح غم تو وقت شام آتا ہے

خلوص دل کی اپنے قدر ہو جس بزم میں ہمدم

وہیں جا کر اصول زندگی بھی کام آتا ہے

مذاق زندگی کیا خاک بدلیں ایسی محفل کا

جہاں ہر روز ہم پر اک نیا الزام آتا ہے

مری ناکامئ قسمت تماشا کر دکھاتی ہے

لبوں تک جب کبھی میرے خوشی کا جام آتا ہے

اسی کو ہم سمجھ لیتے ہیں اپنا سادگی دیکھو

جو اپنے ساتھ راہ شوق میں دو گام آتا ہے

مرے ظلمت کدے میں تیرگی بڑھتی ہے جب حد سے

مرا داغ جگر بن کر چراغ شام آتا ہے

غنیمت ہے جو اس نے یاد فرمایا ہے چل اے دل

کہیں اس کی طرف سے روز یوں پیغام آتا ہے

مری مے نوشیاں پیر مغاں کے دم سے قائم ہیں

کرم ہوتا ہے جب اس کا تو مجھ تک جام آتا ہے

جسے ہے کام عشرت سے وہ قید غم کو کیا جانے

سمجھتا ہے وہ قید غم جو زیر دام آتا ہے

اسی کی زندگی ہے زندگی دنیا میں اے خوشترؔ

وہی انسان ہے انساں جو سب کے کام آتا ہے