nigah-e-shoKH se jab shauq ka paigham aata hai

nigāh-e-shoḳh se jab shauq kā paiġhām aatā hai

hameñ us dam ḳhayāl-e-gardish-e-ayyām aatā hai

vahī ik vaqt hotā hai jo apne kaam aatā hai

kabhī barsoñ meñ jab daur-e-bahār-e-jām aatā hai

kahāñ ārām rakkhā hai kahāñ ārām aatā hai

guzar jaatī hai sub.h-e-ġham to vaqt-e-shām aatā hai

ḳhulūs-e-dil kī apne qadr ho jis bazm meñ hamdam

vahīñ jā kar usūl-e-zindagī bhī kaam aatā hai

mazāq-e-zindagī kyā ḳhaak badleñ aisī mahfil kā

jahāñ har roz ham par ik nayā ilzām aatā hai

mirī nākāmī-e-qismat tamāshā kar dikhātī hai

laboñ tak jab kabhī mere ḳhushī kā jaam aatā hai

usī ko ham samajh lete haiñ apnā sādgī dekho

jo apne saath rāh-e-shauq meñ do-gām aatā hai

mire zulmat-kade meñ tīrgī baḌhtī hai jab had se

mirā dāġh-e-jigar ban kar charāġh-e-shām aatā hai

ġhanīmat hai jo us ne yaad farmāyā hai chal ai dil

kahīñ us kī taraf se roz yuuñ paiġhām aatā hai

mirī mai-noshiyāñ pīr-e-muġhāñ ke dam se qaa.em haiñ

karam hotā hai jab us kā to mujh tak jaam aatā hai

jise hai kaam 'ishrat se vo qaid-e-ġham ko kyā jaane

samajhtā hai vo qaid-e-ġham jo zer-e-dām aatā hai

usī kī zindagī hai zindagī duniyā meñ ai 'ḳhushtar'

vahī insān hai insāñ jo sab ke kaam aatā hai

nigah-e-shoKH se jab shauq ka paigham aata hai

hamein us dam KHayal-e-gardish-e-ayyam aata hai

wahi ek waqt hota hai jo apne kaam aata hai

kabhi barson mein jab daur-e-bahaar-e-jam aata hai

kahan aaram rakkha hai kahan aaram aata hai

guzar jati hai subh-e-gham to waqt-e-sham aata hai

KHulus-e-dil ki apne qadr ho jis bazm mein hamdam

wahin ja kar usul-e-zindagi bhi kaam aata hai

mazaq-e-zindagi kya KHak badlen aisi mahfil ka

jahan har roz hum par ek naya ilzam aata hai

meri nakaami-e-qismat tamasha kar dikhati hai

labon tak jab kabhi mere KHushi ka jam aata hai

usi ko hum samajh lete hain apna sadgi dekho

jo apne sath rah-e-shauq mein do-gam aata hai

mere zulmat-kade mein tirgi baDhti hai jab had se

mera dagh-e-jigar ban kar charagh-e-sham aata hai

ghanimat hai jo us ne yaad farmaya hai chal ai dil

kahin us ki taraf se roz yun paigham aata hai

meri mai-noshiyan pir-e-mughan ke dam se qaem hain

karam hota hai jab us ka to mujh tak jam aata hai

jise hai kaam 'ishrat se wo qaid-e-gham ko kya jaane

samajhta hai wo qaid-e-gham jo zer-e-dam aata hai

usi ki zindagi hai zindagi duniya mein ai 'KHushtar'

wahi insan hai insan jo sab ke kaam aata hai