nigah-e-yar mein dekhi hai be-ruKHi maine

nigāh-e-yār meñ dekhī hai be-ruḳhī maiñ ne

qasam ḳhudā kī na sochā thā ye kabhī maiñ ne

matā'-e-kaif luTā kar talab kī rāhoñ meñ

tire vajūd ko baḳhshī hai tāzgī maiñ ne

mire laboñ pe tabassum na DhūñD ai saaqī

ġham-e-hayāt ko de dī hai har ḳhushī maiñ ne

gunāhgār hai tū bhī mirī tarah nāseh

siyāhī ruuh ke chehre pe dekh lī maiñ ne

zamāna ban gayā dushman to ġham nahīñ 'sābir'

kisī kī zulf-e-pareshāñ sañvār dī maiñ ne

nigah-e-yar mein dekhi hai be-ruKHi main ne

qasam KHuda ki na socha tha ye kabhi main ne

mata'-e-kaif luTa kar talab ki rahon mein

tere wajud ko baKHshi hai tazgi main ne

mere labon pe tabassum na DhunD ai saqi

gham-e-hayat ko de di hai har KHushi main ne

gunahgar hai tu bhi meri tarah naseh

siyahi ruh ke chehre pe dekh li main ne

zamana ban gaya dushman to gham nahin 'sabir'

kisi ki zulf-e-pareshan sanwar di main ne