nigah ko jo unhen dekhne ki tab nahin

nigāh ko jo unheñ dekhne kī taab nahīñ

yahī hijāb hai un kā ki ab hijāb nahīñ

vo kaun hai jo halāk-e-sad-iztirāb nahīñ

ḳharāb tū hī dil-e-ḳhānumāñ-ḳharāb nahīñ

farāz-e-dāman-e-hastī pe daaġh hai goyā

vo zindagī jo mohabbat meñ kāmyāb nahīñ

bas ek baar mirī talḳh-kāmiyoñ pe nazar

tirī nigāh meñ jiinā agar 'azāb nahīñ

nazāra-soz hai barq-e-jamāl-e-dost magar

nigāh-e-shauq kī fitrat meñ inqalāb nahīñ

nigāh-e-yār tirī mastiyāñ are tauba

ye haal hai ki mujhe hājat-e-sharāb nahīñ

ye ro'b-e-husn ye shān-e-jamāl kyā kahnā

vo sāmne haiñ magar dekhne kī taab nahīñ

tirī nigāh kī mā'sūm barhamī kī qasam

tirā 'itāb ba-andāza-e-'itāb nahīñ

sukūt-e-shab meñ ḳhudāyā ye kis kī yaad aa.ī

ki mere dīda-e-tar ko majāl-e-ḳhvāb nahīñ

ḳhudī bhī hai mirī ham-rang-e-be-ḳhudī yā'nī

vahāñ huuñ maiñ ki jahāñ maiñ bhī bāryāb nahīñ

na jaane kyoñ mujhe is kā yaqīñ nahīñ aatā

ki merī zindagī-e-‘ishq kāmyāb nahīñ

kamāl-e-zabt ko vaj.h-e-sukūn-e-dil na samajh

ye iztirāb kī had hai ki iztirāb nahīñ

ḳhud apnī aag meñ jalne kā lutf kyā jaane

'hazīñ' jo soz-e-mohabbat se faizyāb nahīñ

nigah ko jo unhen dekhne ki tab nahin

yahi hijab hai un ka ki ab hijab nahin

wo kaun hai jo halak-e-sad-iztirab nahin

KHarab tu hi dil-e-KHanuman-KHarab nahin

faraaz-e-daman-e-hasti pe dagh hai goya

wo zindagi jo mohabbat mein kaamyab nahin

bas ek bar meri talKH-kaamiyon pe nazar

teri nigah mein jina agar 'azab nahin

nazara-soz hai barq-e-jamal-e-dost magar

nigah-e-shauq ki fitrat mein inqalab nahin

nigah-e-yar teri mastiyan are tauba

ye haal hai ki mujhe hajat-e-sharab nahin

ye ro'b-e-husn ye shan-e-jamal kya kahna

wo samne hain magar dekhne ki tab nahin

teri nigah ki ma'sum barhami ki qasam

tera 'itab ba-andaza-e-'itab nahin

sukut-e-shab mein KHudaya ye kis ki yaad aai

ki mere dida-e-tar ko majal-e-KHwab nahin

KHudi bhi hai meri ham-rang-e-be-KHudi ya'ni

wahan hun main ki jahan main bhi baryab nahin

na jaane kyon mujhe is ka yaqin nahin aata

ki meri zindagi-e-‘ishq kaamyab nahin

kamal-e-zabt ko wajh-e-sukun-e-dil na samajh

ye iztirab ki had hai ki iztirab nahin

KHud apni aag mein jalne ka lutf kya jaane

'hazin' jo soz-e-mohabbat se faizyab nahin