nigah o dil bhi qadam ki tarah mila ke chale

nigāh o dil bhī qadam kī tarah milā ke chale

kis ittihād se raahī rah-e-vafā ke chale

vahāñ se ro ke uThe aur muskurā ke chale

balā kā ġham thā hamīñ the ki ġham chhupā ke chale

fasurda-dil the magar bazm ko hañsā ke chale

kalī na tum se khilī ham chaman ḳhalā ke chale

lipaT na jaa.e kahīñ raah pā-e-nāzuk se

ye aap haath se dāman kahāñ chhuḌā ke chale

tumhīñ ne dil ke añdhere ko dī ziyā-e-umīd

tumhīñ ġharīb ke ghar kā diyā bujhā ke chale

kisī ko dekhte dekhā udaas ho ga.e tum

nazar hai koī kahāñ tak bachā bachā ke chale

'nazīr' huuñ vo sharābī ba-faiz-e-pīr-e-muġhāñ

nigāh Daal duuñ jis par vo laḌkhaḌā ke chale

nigah o dil bhi qadam ki tarah mila ke chale

kis ittihad se rahi rah-e-wafa ke chale

wahan se ro ke uThe aur muskura ke chale

bala ka gham tha hamin the ki gham chhupa ke chale

fasurda-dil the magar bazm ko hansa ke chale

kali na tum se khili hum chaman KHala ke chale

lipaT na jae kahin rah pa-e-nazuk se

ye aap hath se daman kahan chhuDa ke chale

tumhin ne dil ke andhere ko di ziya-e-umid

tumhin gharib ke ghar ka diya bujha ke chale

kisi ko dekhte dekha udas ho gae tum

nazar hai koi kahan tak bacha bacha ke chale

'nazir' hun wo sharabi ba-faiz-e-pir-e-mughan

nigah Dal dun jis par wo laDkhaDa ke chale