nigah phir se wahi shakl ru-baru chahe

nigāh phir se vahī shakl rū-barū chāhe

vo shakl mausam-e-gul jis se rang-o-bū chāhe

na terā zikr na vo terī guftugū chāhe

ki us ko chāhiye kyā aur jis ko tū chāhe

yaqīn donoñ ko hai aur is mohabbat kā

na e'tirāf kabhī maiñ karūñ na tū chāhe

ye haal ho to koī us se kyā kahe jis ko

hayā bhī aa.e magar sharh-e-ārzū chāhe

kahīñ se shab kī mazammat kā silsila to chale

koī to ho jo ujāloñ ko surḳh-rū chāhe

use ḳhabar hai ki ham us pe jaan dete haiñ

anā-parast hai iz.hār rū-barū chāhe

'surūr' harf-shanāsī kī manzileñ haiñ kaThin

ki ye riyāzat-e-fan dil lahū-lahū chāhe

nigah phir se wahi shakl ru-baru chahe

wo shakl mausam-e-gul jis se rang-o-bu chahe

na tera zikr na wo teri guftugu chahe

ki us ko chahiye kya aur jis ko tu chahe

yaqin donon ko hai aur is mohabbat ka

na e'tiraf kabhi main karun na tu chahe

ye haal ho to koi us se kya kahe jis ko

haya bhi aae magar sharh-e-arzu chahe

kahin se shab ki mazammat ka silsila to chale

koi to ho jo ujalon ko surKH-ru chahe

use KHabar hai ki hum us pe jaan dete hain

ana-parast hai izhaar ru-baru chahe

'surur' harf-shanasi ki manzilen hain kaThin

ki ye riyazat-e-fan dil lahu-lahu chahe