nigah yunhi na bas rahguzar se wapas aa

nigāh yūñhī na bas rahguzar se vāpas aa

murassā ho ke hadoñ kī ḳhabar se vāpas aa

tū mujh se haT ke kahīñ aur kyoñ rahe āḳhir

nikal ke manzar-e-dīvār-o-dar se vāpas aa

agar haiñ dekhnā apnī tajalliyāñ mujh meñ

utar ke nuur kā dariyā qamar se vāpas aa

falak pe baiThā huā jaane kaun hai mujh se

ye kah rahā hai ki tū bahr-o-bar se vāpas aa

sukūn-o-amn kā sāhil hai muntazir terā

mirī hayāt kī kashtī bhañvar se vāpas aa

tū us ko bhiiḌ meñ har chand pā nahīñ saktā

ḳhudā milegā ḳhudāoñ ke ghar se vāpas aa

vafā kitāb meñ paḌh le vafā ke ḳhvāb na dekh

tū 'ehtishām' ḳhayālī safar se vāpas aa

nigah yunhi na bas rahguzar se wapas aa

murassa ho ke hadon ki KHabar se wapas aa

tu mujh se haT ke kahin aur kyon rahe aaKHir

nikal ke manzar-e-diwar-o-dar se wapas aa

agar hain dekhna apni tajalliyan mujh mein

utar ke nur ka dariya qamar se wapas aa

falak pe baiTha hua jaane kaun hai mujh se

ye kah raha hai ki tu bahr-o-bar se wapas aa

sukun-o-amn ka sahil hai muntazir tera

meri hayat ki kashti bhanwar se wapas aa

tu us ko bhiD mein har chand pa nahin sakta

KHuda milega KHudaon ke ghar se wapas aa

wafa kitab mein paDh le wafa ke KHwab na dekh

tu 'ehtisham' KHayali safar se wapas aa