nigahon hi nigahon mein ishaare hote jate hain

nigāhoñ hī nigāhoñ meñ ishāre hote jaate haiñ

vo ab āhista āhista hamāre hote jaate haiñ

jo zāhir husn ke rangīñ nazāre hote jaate haiñ

nigāh-e-shauq meñ vo aur pyāre hote jaate haiñ

ḳhudā rakkhe havādis ko talātum ko masā.ib ko

hamārī zindagānī ke sahāre hote jaate haiñ

tumhāre ġham ne aisā ehtirām-e-ġham sikhāyā hai

ki duniyā bhar ke ġham saare hamāre hote jaate haiñ

tasallī bhī baḌī mushkil se miltī hai tasavvur meñ

ġhalat-fahmī salāmat vo hamāre hote jaate haiñ

jahāñ soz-e-ġham-e-furqat fazā-e-dil ko jhulsā de

vahāñ ḳhush-rang aañsū bhī sharāre hote jaate haiñ

tire jalvoñ ne aisī tarbiyat dī hai nigāhoñ ko

nazar meñ jazb ab saare nazāre hote jaate haiñ

gudāz-e-qalb kī daulat atā kī hai mohabbat ne

bahut shā.ista tere ġham ke maare hote jaate haiñ

koī shai jal rahī hai ġhāliban siine meñ ai 'aḳhtar'

ki mere shabnamī aañsū sharāre hote jaate haiñ

nigahon hi nigahon mein ishaare hote jate hain

wo ab aahista aahista hamare hote jate hain

jo zahir husn ke rangin nazare hote jate hain

nigah-e-shauq mein wo aur pyare hote jate hain

KHuda rakkhe hawadis ko talatum ko masaib ko

hamari zindagani ke sahaare hote jate hain

tumhaare gham ne aisa ehtiram-e-gham sikhaya hai

ki duniya bhar ke gham sare hamare hote jate hain

tasalli bhi baDi mushkil se milti hai tasawwur mein

ghalat-fahmi salamat wo hamare hote jate hain

jahan soz-e-gham-e-furqat faza-e-dil ko jhulsa de

wahan KHush-rang aansu bhi sharare hote jate hain

tere jalwon ne aisi tarbiyat di hai nigahon ko

nazar mein jazb ab sare nazare hote jate hain

gudaz-e-qalb ki daulat ata ki hai mohabbat ne

bahut shaista tere gham ke mare hote jate hain

koi shai jal rahi hai ghaaliban sine mein ai 'aKHtar'

ki mere shabnami aansu sharare hote jate hain