nigahon ko KHala mein zehn ko daftar mein rakh denge

nigāhoñ ko ḳhalā meñ zehn ko daftar meñ rakh deñge

magar apne masā.il ghar ke haiñ ham ghar meñ rakh deñge

sulagte zehn zaḳhmī fikr nam āñkheñ pareshāñ dil

ham ik ik chiiz apne sher ke paikar meñ rakh deñge

matā-e-fikr-e-nau jab zehn-e-ḳhvābīda meñ rakhnī hai

to ham ḳhūn-e-qalam bhī us ke pas-manzar meñ rakh deñge

ham aise dānish-o-afkār vaale haiñ ki jab chāheñ

sharar shīshe meñ rakh deñge lahū patthar meñ rakh deñge

badal jā.egā andāz-e-nazar raushan-ḳhayāloñ kā

agar ham raat kī ḳhush-paikarī sāġhar meñ rakh deñge

lahū ban kar jo bahtā hai makāñ ban kar jo jaltā hai

vo andesha bhī ham ehsās kī chādar meñ rakh deñge

khulī āñkhoñ se dekhe jā.eñge sūraj ke āñgan meñ

kuchh aise ḳhvāb ham alfāz ke paikar meñ rakh deñge

tahī-dastī hī jab apnā muqaddar bantī jā.egī

yaqīñ kā saarā sarmāya gumāñ ke ghar meñ rakh deñge

shu.ūr-o-fan jise chhū kar fazā meñ nuur barsā.eñ

ik aisī shai bhī ham mafhūm ke daftar meñ rakh deñge

nigahon ko KHala mein zehn ko daftar mein rakh denge

magar apne masail ghar ke hain hum ghar mein rakh denge

sulagte zehn zaKHmi fikr nam aankhen pareshan dil

hum ek ek chiz apne sher ke paikar mein rakh denge

mata-e-fikr-e-nau jab zehn-e-KHwabida mein rakhni hai

to hum KHun-e-qalam bhi us ke pas-manzar mein rakh denge

hum aise danish-o-afkar wale hain ki jab chahen

sharar shishe mein rakh denge lahu patthar mein rakh denge

badal jaega andaz-e-nazar raushan-KHayalon ka

agar hum raat ki KHush-paikari saghar mein rakh denge

lahu ban kar jo bahta hai makan ban kar jo jalta hai

wo andesha bhi hum ehsas ki chadar mein rakh denge

khuli aankhon se dekhe jaenge suraj ke aangan mein

kuchh aise KHwab hum alfaz ke paikar mein rakh denge

tahi-dasti hi jab apna muqaddar banti jaegi

yaqin ka sara sarmaya guman ke ghar mein rakh denge

shuur-o-fan jise chhu kar faza mein nur barsaen

ek aisi shai bhi hum mafhum ke daftar mein rakh denge