nigar-e-husn ko had se farawan kaun dekhega

nigār-e-husn ko had se farāvāñ kaun dekhegā

nigāh-e-shauq ko apnī pareshāñ kaun dekhegā

sanam-ḳhāne meñ shakl-e-zabt-e-armāñ kaun dekhegā

tumhāre sāmne tasvīr-e-be-jāñ kaun dekhegā

na dekhūñ maiñ to husn-e-'ishq-sāmāñ kaun dekhegā

sukūñ kī justujū meñ nabz-e-tūfāñ kaun dekhegā

kahegā kaun in ko jān-e-jānāñ kaun dekhegā

na hoñge baam se jab tak numāyāñ kaun dekhegā

ba-nutq-e-soz-e-bāqī kah rahī hai ḳhāk-e-parvāna

nasīb-e-sham' ab andāz-e-sozāñ kaun dekhegā

shu'ūr-e-parda-dārī dar-haqīqat jaan rakhtā hai

sar-e-mahfil unheñ bā-shart-e-īmāñ kaun dekhegā

jahāñ rangīnī-e-hūr-o-tahūrā sar-basar hogī

vahāñ ġhammāzī-e-ḳhushkī-e-īmāñ kaun dekhegā

ġham-e-hastī kā mātam hī agar madd-e-nazar hogā

zarā sā hosh se le luñgā ehsāñ kaun dekhegā

diye raushan kiye haiñ aaj mehrāb-e-tamannā par

jo tum dekho na dekho ye charāġhāñ kaun dekhegā

qiyām-e-mustaqil dil meñ nahīñ shāyān-e-shāñ tāham

barā.e-nām hī ho jaao mehmāñ kaun dekhegā

mazāq-e-'shād' kī nigrāñ rahe chashm-e-karam varna

nigāh-e-dil ko yaksar naqsh-e-hairāñ kaun dekhegā

nigar-e-husn ko had se farawan kaun dekhega

nigah-e-shauq ko apni pareshan kaun dekhega

sanam-KHane mein shakl-e-zabt-e-arman kaun dekhega

tumhaare samne taswir-e-be-jaan kaun dekhega

na dekhun main to husn-e-'ishq-saman kaun dekhega

sukun ki justuju mein nabz-e-tufan kaun dekhega

kahega kaun in ko jaan-e-jaanan kaun dekhega

na honge baam se jab tak numayan kaun dekhega

ba-nutq-e-soz-e-baqi kah rahi hai KHak-e-parwana

nasib-e-sham' ab andaz-e-sozan kaun dekhega

shu'ur-e-parda-dari dar-haqiqat jaan rakhta hai

sar-e-mahfil unhen ba-shart-e-iman kaun dekhega

jahan rangini-e-hur-o-tahura sar-basar hogi

wahan ghammazi-e-KHushki-e-iman kaun dekhega

gham-e-hasti ka matam hi agar madd-e-nazar hoga

zara sa hosh se le lunga ehsan kaun dekhega

diye raushan kiye hain aaj mehrab-e-tamanna par

jo tum dekho na dekho ye charaghan kaun dekhega

qiyam-e-mustaqil dil mein nahin shayan-e-shan taham

barae-nam hi ho jao mehman kaun dekhega

mazaq-e-'shad' ki nigran rahe chashm-e-karam warna

nigah-e-dil ko yaksar naqsh-e-hairan kaun dekhega