nigar-e-ulfat pe khulta paikar kahin nahin hai koi nahin hai

nigār-e-ulfat pe khultā paikar kahīñ nahīñ hai koī nahīñ hai

sabhī haiñ rahzan pe apnā rahbar kahīñ nahīñ hai koī nahīñ hai

mujhe mohabbat hai tum se ye to bajā hai lekin ai mere dilbar

mirī mohabbat ke gul kā mehvar kahīñ nahīñ hai koī nahīñ hai

maiñ tishna-lab huuñ shikasta-pā huuñ darīda-tan huuñ tire nagar meñ

bujhā.e jo tishnagī vo sāġhar kahīñ nahīñ hai koī nahīñ hai

tamām duniyā ke gulsitāñ to mirī nazar meñ base haiñ lekin

tumhāre jaisā hasīn manzar kahīñ nahīñ hai koī nahīñ hai

maiñ bām-o-dar kā makīñ huuñ lekin hai dasht-e-vīrāñ mire jigar meñ

bhare zamāne meñ mujh sā be-ghar kahīñ nahīñ hai koī nahīñ hai

jo mere ḳhāshāk se kaf-e-dil ko gul banā.e sajā ke rakkhe

mire muqaddar kā vo sikandar kahīñ nahīñ hai koī nahīñ hai

kahāñ ko jā.ūñ kahāñ se lā.ūñ maiñ tere jaisā saḳhī-o-ā'lā

tirā to saaya bhī is zamīñ par kahīñ nahīñ hai koī nahīñ hai

nigar-e-ulfat pe khulta paikar kahin nahin hai koi nahin hai

sabhi hain rahzan pe apna rahbar kahin nahin hai koi nahin hai

mujhe mohabbat hai tum se ye to baja hai lekin ai mere dilbar

meri mohabbat ke gul ka mehwar kahin nahin hai koi nahin hai

main tishna-lab hun shikasta-pa hun darida-tan hun tere nagar mein

bujhae jo tishnagi wo saghar kahin nahin hai koi nahin hai

tamam duniya ke gulsitan to meri nazar mein base hain lekin

tumhaare jaisa hasin manzar kahin nahin hai koi nahin hai

main baam-o-dar ka makin hun lekin hai dasht-e-viran mere jigar mein

bhare zamane mein mujh sa be-ghar kahin nahin hai koi nahin hai

jo mere KHashak se kaf-e-dil ko gul banae saja ke rakkhe

mere muqaddar ka wo sikandar kahin nahin hai koi nahin hai

kahan ko jaun kahan se laun main tere jaisa saKHi-o-a'la

tera to saya bhi is zamin par kahin nahin hai koi nahin hai