nigah-e-lutf-o-inayat ka sila le jao

nigah-e-lutf-o-ināyat kā sila le jaao

dil se niklī hai jo mere vo du'ā le jaao

lab pe na.ara hai mohabbat kā magar dil meñ fareb

mujh ko is bazm se lillāh uThā le jaao

ishq ko zinda-e-jāved banānā hai agar

kū-e-mahbūb se jiine kī adā le jaao

bhuul kar bhī sitam-e-yār kā shikva na karo

mujh se ai bul-havaso dars-e-vafā le jaao

pākbāzān-e-haram aur tū maiḳhāne meñ

ġhair mumkin hai ki dāman ko bachā le jaao

muskurānā hai jo gulzār kī dil-kash kaliyo

lab-e-jānāñ se tabassum kī adā le jaao

ai havāo na taḌap jaa.eñ vo sunte hī kahīñ

mere TuuTe hue dil kī na sadā le jaao

'shā.ir' afsos hai mai pī ke bahak jaate ho

mai-kade se kahīñ tum bhī na nikāle jaao

nigah-e-lutf-o-inayat ka sila le jao

dil se nikli hai jo mere wo du'a le jao

lab pe nara hai mohabbat ka magar dil mein fareb

mujh ko is bazm se lillah uTha le jao

ishq ko zinda-e-jawed banana hai agar

ku-e-mahbub se jine ki ada le jao

bhul kar bhi sitam-e-yar ka shikwa na karo

mujh se ai bul-hawaso dars-e-wafa le jao

pakbazan-e-haram aur tu maiKHane mein

ghair mumkin hai ki daman ko bacha le jao

muskurana hai jo gulzar ki dil-kash kaliyo

lab-e-jaanan se tabassum ki ada le jao

ai hawao na taDap jaen wo sunte hi kahin

mere TuTe hue dil ki na sada le jao

'shair' afsos hai mai pi ke bahak jate ho

mai-kade se kahin tum bhi na nikale jao