nigah kya aur mizha kya ai sanam isko bhi usko bhi

nigah kyā aur mizha kyā ai sanam is ko bhī us ko bhī

samajhte haiñ qazā kā tiir ham is ko bhī us ko bhī

paḌe the dil ke pīchhe us ko to ġhārat kiyā tum ne

rahā ab diin o īmāñ lo sanam is ko bhī us ko bhī

agar le mol ik bose pe merā den o īmān tū

maiñ de dūñgā tire sar kī qasam is ko bhī us ko bhī

haqīqat meñ tafāvut kuchh nahīñ shaiḳh o barahman meñ

sunā hai ham ne bharte terā dam is ko bhī us ko bhī

girā detā hai āñkhoñ se mirī sumbul ho yā nāgin

tumhārī kākul-e-pechāñ kā ḳham is ko bhī us ko bhī

kabhī tevarī chaḌhānā aur kabhī muñh pher kar hañsnā

tirā āshiq samajhtā hai sitam is ko bhī us ko bhī

hamārī aabrū kyā aur dil par hausla kaisā

Dubo denā arī o chashm-e-nam is ko bhī us ko bhī

kiyā iqrār bosa dene kā diiñ gāliyāñ tum ne

faqīr-e-ishq huuñ samjhā karam is ko bhī us ko bhī

ḳhat-e-mahbūb o pā-e-nāma-bar qismat se haath aa.e

lagā āñkhoñ se 'anjum' dam-ba-dam is ko bhī us ko bhī

nigah kya aur mizha kya ai sanam is ko bhi us ko bhi

samajhte hain qaza ka tir hum is ko bhi us ko bhi

paDe the dil ke pichhe us ko to ghaarat kiya tum ne

raha ab din o iman lo sanam is ko bhi us ko bhi

agar le mol ek bose pe mera den o iman tu

main de dunga tere sar ki qasam is ko bhi us ko bhi

haqiqat mein tafawut kuchh nahin shaiKH o barahman mein

suna hai hum ne bharte tera dam is ko bhi us ko bhi

gira deta hai aankhon se meri sumbul ho ya nagin

tumhaari kakul-e-pechan ka KHam is ko bhi us ko bhi

kabhi tewari chaDhana aur kabhi munh pher kar hansna

tera aashiq samajhta hai sitam is ko bhi us ko bhi

hamari aabru kya aur dil par hausla kaisa

Dubo dena ari o chashm-e-nam is ko bhi us ko bhi

kiya iqrar bosa dene ka din galiyan tum ne

faqir-e-ishq hun samjha karam is ko bhi us ko bhi

KHat-e-mahbub o pa-e-nama-bar qismat se hath aae

laga aankhon se 'anjum' dam-ba-dam is ko bhi us ko bhi