nind mushkil se faqat ek ghaDi rahti hai

niiñd mushkil se faqat ek ghaḌī rahtī hai

phir mirī aañkh meñ ḳhvāboñ kī laḌī rahtī hai

dil vo sahrā hai jahāñ phuul khilā karte the

aañkh vo jhiil jahāñ os paḌī rahtī hai

yaad karne kā koī vaqt muqarrar hai bhalā

ye musībat to mire sar pe khaḌī rahtī hai

tujh se vaise to koī kaam nahīñ hai mujh ko

tujh se milne kī magar chaah baḌī rahtī hai

maiñ bahut zor se hañstā huuñ udāsī ke samay

aah chupke se kahīñ dil meñ gaḌī rahtī hai

dost āsānī se manzil to nahīñ mil saktī

kyoñ ki rastoñ pe yahāñ gard paḌī rahtī hai

vo bahut din se mire paas nahīñ hai rāshid

ek muddat se mirī chaa.e kaḌī rahtī hai

nind mushkil se faqat ek ghaDi rahti hai

phir meri aankh mein KHwabon ki laDi rahti hai

dil wo sahra hai jahan phul khila karte the

aankh wo jhil jahan os paDi rahti hai

yaad karne ka koi waqt muqarrar hai bhala

ye musibat to mere sar pe khaDi rahti hai

tujh se waise to koi kaam nahin hai mujh ko

tujh se milne ki magar chah baDi rahti hai

main bahut zor se hansta hun udasi ke samay

aah chupke se kahin dil mein gaDi rahti hai

dost aasani se manzil to nahin mil sakti

kyon ki raston pe yahan gard paDi rahti hai

wo bahut din se mere pas nahin hai rashid

ek muddat se meri chae kaDi rahti hai