nikal laya hai ghar se KHayal ka kya ho

nikāl laayā hai ghar se ḳhayāl kā kyā ho

lagā hai zaḳhm to ab indimāl kā kyā ho

le aa.e kūcha-e-dilbar se dil ko samjhā kar

hai be-qarār bahut dekh-bhāl kā kyā ho

luTā ke maazī nazar is sadī pe rakkhī hai

pe naqsha dekhiye tahsīl haal kā kyā ho

abhī zamāna-e-maujūd kī giraft meñ huuñ

maiñ sochtā huuñ ki fikr-e-ma.āl kā kyā ho

thā bāb-e-shauq ki aurāq-e-shab pe likhte rahe

uḌā ke le ga.ī shab to malāl kā kyā ho

ḳhayāl-e-ḳhām ko duniyā apaj samajhtī hai

hamārī dīda-varī ke kamāl kā kyā ho

nigār-e-zīst ko avval bahut hasīñ paayā

ulajh gayā huuñ to ab is vabāl kā kyā ho

jo asl mājrā thā barmalā kahā maiñ ne

phir us ke ba.ad tire ehtimāl kā kyā ho

ḳhayāl rahtā hai 'shāhid' vo tursh-rū hai bahut

vahāñ jo jā.ūñ to vaz-e-savāl kā kyā ho

nikal laya hai ghar se KHayal ka kya ho

laga hai zaKHm to ab indimal ka kya ho

le aae kucha-e-dilbar se dil ko samjha kar

hai be-qarar bahut dekh-bhaal ka kya ho

luTa ke mazi nazar is sadi pe rakkhi hai

pe naqsha dekhiye tahsil haal ka kya ho

abhi zamana-e-maujud ki giraft mein hun

main sochta hun ki fikr-e-maal ka kya ho

tha bab-e-shauq ki auraq-e-shab pe likhte rahe

uDa ke le gai shab to malal ka kya ho

KHayal-e-KHam ko duniya apaj samajhti hai

hamari dida-wari ke kamal ka kya ho

nigar-e-zist ko awwal bahut hasin paya

ulajh gaya hun to ab is wabaal ka kya ho

jo asl majra tha barmala kaha main ne

phir us ke baad tere ehtimal ka kya ho

KHayal rahta hai 'shahid' wo tursh-ru hai bahut

wahan jo jaun to waz-e-sawal ka kya ho