nikal kar dil se ek ik ki zaban tak baat ja pahunchi

nikal kar dil se ik ik kī zabāñ tak baat jā pahuñchī

kahāñ kī baat thī lekin kahāñ tak baat jā pahuñchī

ġhurūr-e-husn un ko thā ġhurūr-e-ishq thā ham ko

ta.ajjub kyā jo āḳhir imtihāñ tak baat jā pahuñchī

mohabbat karne vaale jaan par bhī khel jaate haiñ

vafā kaisī agar sūd-o-ziyāñ tak baat jā pahuñchī

nazar sahvan uThī un par fasāne ban ga.e kyā kyā

zarā sī baat thī lekin kahāñ tak baat jā pahuñchī

hamāre ishq ke charche kahīñ roke se rukte haiñ

ab us kī is kī ik ik kī zabāñ tak baat jā pahuñchī

gila kaisā shikāyat kyoñ pashemānī se kyā hāsil

jahāñ tak tum ne pahuñchā dī vahāñ tak baat jā pahuñchī

mohabbat laakh pardoñ meñ bhī zāhir ho ga.ī āḳhir

dil-e-ḳhāmosh se har īn-o-āñ tak baat jā pahuñchī

pahuñchnī thī lab-e-sāqī se jo mujh rind-e-mai-kash tak

ta.ajjub hai vo zāhid kī zabāñ tak baat jā pahuñchī

mohabbat do diloñ kā raaz ham samjhe the ai 'shaidā'

na jaane kis tarah saare jahāñ tak baat jā pahuñchī

nikal kar dil se ek ek ki zaban tak baat ja pahunchi

kahan ki baat thi lekin kahan tak baat ja pahunchi

ghurur-e-husn un ko tha ghurur-e-ishq tha hum ko

tajjub kya jo aaKHir imtihan tak baat ja pahunchi

mohabbat karne wale jaan par bhi khel jate hain

wafa kaisi agar sud-o-ziyan tak baat ja pahunchi

nazar sahwan uThi un par fasane ban gae kya kya

zara si baat thi lekin kahan tak baat ja pahunchi

hamare ishq ke charche kahin roke se rukte hain

ab us ki is ki ek ek ki zaban tak baat ja pahunchi

gila kaisa shikayat kyon pashemani se kya hasil

jahan tak tum ne pahuncha di wahan tak baat ja pahunchi

mohabbat lakh pardon mein bhi zahir ho gai aaKHir

dil-e-KHamosh se har in-o-an tak baat ja pahunchi

pahunchni thi lab-e-saqi se jo mujh rind-e-mai-kash tak

tajjub hai wo zahid ki zaban tak baat ja pahunchi

mohabbat do dilon ka raaz hum samjhe the ai 'shaida'

na jaane kis tarah sare jahan tak baat ja pahunchi