nikal kar halqa-e-ahl-e-asar se bhag jaun main

nikal kar halqa-e-ahl-e-asar se bhaag jā.ūñ maiñ

ka.ī din se ye ḳhvāhish hai ki ghar se bhaag jā.ūñ maiñ

zarā himmat kare ye dil to shāyad dūsre pal meñ

chhuḌā kar jaan dast-e-chāra-gar se bhaag jā.ūñ maiñ

abhī raste meñ haiñ kuchh jāne-pahchāne hue chehre

hirāsāñ ho ke kyoñ gard-e-safar se bhaag jā.ūñ maiñ

chalo yūñhī sahī ab ke ziyāda bārisheñ hoñgī

to kyā apne shikasta bām-o-dar se bhaag jā.ūñ maiñ

chalo yūñhī sahī ab ke nishāne par faqat huuñ maiñ

to kyā muñh pher kar un kī nazar se bhaag jā.ūñ maiñ

kahāñ vo aañkh ki is baam se aage bhī kuchh dekhūñ

kahāñ vo paañv ki is rāhguzar se bhaag jā.ūñ maiñ

nikal kar halqa-e-ahl-e-asar se bhag jaun main

kai din se ye KHwahish hai ki ghar se bhag jaun main

zara himmat kare ye dil to shayad dusre pal mein

chhuDa kar jaan dast-e-chaara-gar se bhag jaun main

abhi raste mein hain kuchh jaane-pahchane hue chehre

hirasan ho ke kyon gard-e-safar se bhag jaun main

chalo yunhi sahi ab ke ziyaada barishen hongi

to kya apne shikasta baam-o-dar se bhag jaun main

chalo yunhi sahi ab ke nishane par faqat hun main

to kya munh pher kar un ki nazar se bhag jaun main

kahan wo aankh ki is baam se aage bhi kuchh dekhun

kahan wo panw ki is rahguzar se bhag jaun main