nikal raha hun yaqin ki had se guman ki jaanib

nikal rahā huuñ yaqīñ kī had se gumāñ kī jānib

safar hai merā zamīn se āsmāñ kī jānib

muñDer par koī chashm-e-tar thī ki aa.ina thā

sitāra-e-shām dekhtā thā makāñ kī jānib

ye ḳhvāb hai yā tilism koī ki ḳhushk patte

khiñche chale jā rahe haiñ āb-e-ravāñ kī jānib

koī to uupar se bojh Daalā gayā hai varna

jhukā huā āsmāñ hai kyuuñ ḳhāk-dāñ kī jānib

to phir mire saath us kā chalnā muhāl Thahrā

dhyān rahtā thā us kā sūd-o-ziyāñ kī jānib

sukūnat-e-qalb ḳhālī siine pe aise utrī

amaañ ḳhudī chal ke aa ga.ī be-amāñ kī jānib

nikal raha hun yaqin ki had se guman ki jaanib

safar hai mera zamin se aasman ki jaanib

munDer par koi chashm-e-tar thi ki aaina tha

sitara-e-sham dekhta tha makan ki jaanib

ye KHwab hai ya tilism koi ki KHushk patte

khinche chale ja rahe hain aab-e-rawan ki jaanib

koi to upar se bojh Dala gaya hai warna

jhuka hua aasman hai kyun KHak-dan ki jaanib

to phir mere sath us ka chalna muhaal Thahra

dhyan rahta tha us ka sud-o-ziyan ki jaanib

sukunat-e-qalb KHali sine pe aise utri

aman KHudi chal ke aa gai be-aman ki jaanib