nikal to aae is ujDe hue makan se hum

nikal to aa.e is ujḌe hue makān se ham

tamām shab rahe mahrūm sā.ebān se ham

ham apne vaqt ke baalā buland sūraj the

ġhurūb ho ga.e kis tarah darmiyān se ham

zarā bhī jis meñ nasīhat ho kuchh hidāyat ho

nikāl dete haiñ vo baat apne kaan se ham

dil o dimāġh nahīñ lafz hī karishma hai

to kyā ajab ki hue qatl is zabān se ham

visāl-e-yār se achchhā to hijr hī hai ki ab

sukūñ se rahte haiñ vo bhī aur apnī shaan se ham

ye sar buland to ho jā.egā magar 'jāved'

zarūr jā.eñge ik roz apnī jaan se ham

nikal to aae is ujDe hue makan se hum

tamam shab rahe mahrum saeban se hum

hum apne waqt ke baala buland suraj the

ghurub ho gae kis tarah darmiyan se hum

zara bhi jis mein nasihat ho kuchh hidayat ho

nikal dete hain wo baat apne kan se hum

dil o dimagh nahin lafz hi karishma hai

to kya ajab ki hue qatl is zaban se hum

visal-e-yar se achchha to hijr hi hai ki ab

sukun se rahte hain wo bhi aur apni shan se hum

ye sar buland to ho jaega magar 'jawed'

zarur jaenge ek roz apni jaan se hum