nikhar rahi hai har ek roz zindagi dil ki

nikhar rahī hai har ik roz zindagī dil kī

ki un ke ġham se musalsal hai dostī dil kī

kise ḳhabar hai mohabbat pe kyā guzar jaa.e

tirī nazar na baḌhā.e jo raushnī dil kī

nigāh-e-aql pe chhā.e hue haiñ andeshe

tirī talāsh ko niklī hai be-ḳhudī dil kī

hamārī shām-e-alālat pe kā.enāt nisār

ḳhulūs-e-dost se rag-rag nikhar ga.ī dil kī

vo ibtidā-e-mohabbat meñ ḳhām-kār ravish

hameñ bhī yaad hai be-vaj.h barhamī dil kī

hue haiñ aaj to mānūs bāzū-e-rangīñ

kahīñ ġhurūr meñ bahke na āgahī dil kī

ḳhulūs-e-ishq baḌe marhaloñ se guzrā hai

tab us ke sāmne pahuñchī hai zindagī dil kī

vo kah rahe haiñ ki dīvāna ham banā deñge

ab is maqām pe laa.ī hai kāfirī dil kī

is ik nazar ke sivā aur kaun dekh sake

nikharte chāñd kī zau meñ shaguftagī dil kī

rah-e-hayāt ke kuchh tajrabe sahī 'saifī'

sukūt-e-aql se behtar hai gum-rahī dil kī

nikhar rahi hai har ek roz zindagi dil ki

ki un ke gham se musalsal hai dosti dil ki

kise KHabar hai mohabbat pe kya guzar jae

teri nazar na baDhae jo raushni dil ki

nigah-e-aql pe chhae hue hain andeshe

teri talash ko nikli hai be-KHudi dil ki

hamari sham-e-alalat pe kaenat nisar

KHulus-e-dost se rag-rag nikhar gai dil ki

wo ibtida-e-mohabbat mein KHam-kar rawish

hamein bhi yaad hai be-wajh barhami dil ki

hue hain aaj to manus bazu-e-rangin

kahin ghurur mein bahke na aagahi dil ki

KHulus-e-ishq baDe marhalon se guzra hai

tab us ke samne pahunchi hai zindagi dil ki

wo kah rahe hain ki diwana hum bana denge

ab is maqam pe lai hai kafiri dil ki

is ek nazar ke siwa aur kaun dekh sake

nikharte chand ki zau mein shaguftagi dil ki

rah-e-hayat ke kuchh tajrabe sahi 'saifi'

sukut-e-aql se behtar hai gum-rahi dil ki