nikle the apne hathon se jo ghar sameT kar

nikle the apne hāthoñ se jo ghar sameT kar

har samt rakh diyā vahī manzar sameT kar

jaanā hī gar huā hai muqaddar to jā.iye

aañsū tamām aañkh ke andar sameT kar

ab shart-e-ehtiyāt ko madd-e-nazar rakheñ

nikleñ jahāñ kahīñ bhī magar par sameT kar

kyā jāniye gumāñ thā haqīqat thā ḳhvāb thā

rakkhā thā ik vujūd meñ mahshar sameT kar

sunte haiñ aaj āḳhirī saa.il bhī mar gayā

rastoñ meñ munsifī ke vo chakkar sameT kar

'ḳhurram' amīr-e-shahr kī dariyā-dilī to dekh

baiThe haiñ kitne log yahāñ sar sameT kar

nikle the apne hathon se jo ghar sameT kar

har samt rakh diya wahi manzar sameT kar

jaana hi gar hua hai muqaddar to jaiye

aansu tamam aankh ke andar sameT kar

ab shart-e-ehtiyat ko madd-e-nazar rakhen

niklen jahan kahin bhi magar par sameT kar

kya jaaniye guman tha haqiqat tha KHwab tha

rakkha tha ek wujud mein mahshar sameT kar

sunte hain aaj aaKHiri sail bhi mar gaya

raston mein munsifi ke wo chakkar sameT kar

'KHurram' amir-e-shahr ki dariya-dili to dekh

baiThe hain kitne log yahan sar sameT kar