nikli hai jab kabhi tere band-e-qaba ki baat

niklī hai jab kabhī tire band-e-qabā kī baat

dāman ko chaak karne lage haiñ junūñ ke haat

ik ajnabī kī tarh mile haiñ vo ham se aaj

kahne paḌeñge ‘ahd-e-guzashta ke vāqi’āt

yādoñ ke māhtāb tamannāoñ ke hujūm

sābit hue tamām shab-e-hijr be-sabāt

dāman-kashāñ vo ham se guzarte haiñ dosto

kahte the jo hamīñ ko kabhī hāsil-e-hayāt

detā rahā huuñ maiñ jinheñ tere sitam kā naam

yaad aa rahī haiñ ab vahī pichhlī navāzishāt

tanhā.iyoñ meñ hijr kī yaad aa gayā hai kaun

khulne lage haiñ zaḳhm mahakne lagī hai raat

kaise bachā.eñ dāman-e-ehsās-o-āgahī

lau de uThī hai aaj to ḳhāmoshi-e-hayāt

apnī vafā kā ham ko sila kyā mile 'matīn'

pahchāntī nahīñ hai hameñ chashm-e-iltifāt

nikli hai jab kabhi tere band-e-qaba ki baat

daman ko chaak karne lage hain junun ke hat

ek ajnabi ki tarh mile hain wo hum se aaj

kahne paDenge ‘ahd-e-guzashta ke waqi’at

yaadon ke mahtab tamannaon ke hujum

sabit hue tamam shab-e-hijr be-sabaat

daman-kashan wo hum se guzarte hain dosto

kahte the jo hamin ko kabhi hasil-e-hayat

deta raha hun main jinhen tere sitam ka nam

yaad aa rahi hain ab wahi pichhli nawazishat

tanhaiyon mein hijr ki yaad aa gaya hai kaun

khulne lage hain zaKHm mahakne lagi hai raat

kaise bachaen daman-e-ehsas-o-agahi

lau de uThi hai aaj to KHamoshi-e-hayat

apni wafa ka hum ko sila kya mile 'matin'

pahchanti nahin hai hamein chashm-e-iltifat