nishan manzil ka batlaya na mujhko ham-safar jaana

nishāñ manzil kā batlāyā na mujh ko ham-safar jaanā

tazabzub meñ paḌā hai vo jise maiñ ne ḳhizar jaanā

nazar merī basīrat ko sadā mahdūd rakhtī hai

pas-e-manzar nahīñ dekhā faqat pesh-e-nazar jaanā

jahāñ taqdīr le jaa.e vahāñ raste nahīñ jaate

kiyā thā ruḳh idhar kā kyuuñ likhā thā jab udhar jaanā

havāla zindagī kā bhī tumhārī zulf jaisā hai

bikharnā phir sañvar jaanā sañvarnā phir bikhar jaanā

junūñ kī raah ko ab tak samajh paa.e nahīñ sāhab

ki apne jism ko Dhā kar faqat jaañ se guzar jaanā

Duboyā jis ne kashtī ko use hī nā-ḳhudā samjhe

diye the jis ne saare dukh usī ko chāragar jaanā

unhīñ tārīk rāhoñ se guzarnā hai tumheñ 'ādil'

charāġh-e-jāñ jalā kar tum bilā ḳhauf-o-ḳhatar jaanā

nishan manzil ka batlaya na mujh ko ham-safar jaana

tazabzub mein paDa hai wo jise main ne KHizar jaana

nazar meri basirat ko sada mahdud rakhti hai

pas-e-manzar nahin dekha faqat pesh-e-nazar jaana

jahan taqdir le jae wahan raste nahin jate

kiya tha ruKH idhar ka kyun likha tha jab udhar jaana

hawala zindagi ka bhi tumhaari zulf jaisa hai

bikharna phir sanwar jaana sanwarna phir bikhar jaana

junun ki rah ko ab tak samajh pae nahin sahab

ki apne jism ko Dha kar faqat jaan se guzar jaana

Duboya jis ne kashti ko use hi na-KHuda samjhe

diye the jis ne sare dukh usi ko chaaragar jaana

unhin tarik rahon se guzarna hai tumhein 'adil'

charagh-e-jaan jala kar tum bila KHauf-o-KHatar jaana