nit-nae zulm jhelta hun main

nit-na.e zulm jheltā huuñ maiñ

jurm ye hai ki sochtā huuñ maiñ

mujh ko sahrā-nashīñ rahne do

aane vāloñ kā rāsta huuñ maiñ

aa.ina rakh ke sāmne aksar

terī āñkhoñ meñ jhāñktā huuñ maiñ

mujh ko majzūb sab samajhte haiñ

ḳhud ko thoḌā sā jāntā huuñ maiñ

tujh se milne kī kyā karūñ koshish

ab to ḳhud se bhī bhāgtā huuñ maiñ

pahle chup se tumheñ shikāyat thī

ab ye kahte ho boltā huuñ maiñ

is tarah kaun tujh ko dekhegā

jis tarah tujh ko dekhtā huuñ maiñ

mere lahje ke dard ko samjho

tujh ko jaane se roktā huuñ maiñ

ab to 'āsif' ga.e zamānoñ se

apne baare meñ pūchhtā huuñ maiñ

nit-nae zulm jhelta hun main

jurm ye hai ki sochta hun main

mujh ko sahra-nashin rahne do

aane walon ka rasta hun main

aaina rakh ke samne aksar

teri aankhon mein jhankta hun main

mujh ko majzub sab samajhte hain

KHud ko thoDa sa jaanta hun main

tujh se milne ki kya karun koshish

ab to KHud se bhi bhagta hun main

pahle chup se tumhein shikayat thi

ab ye kahte ho bolta hun main

is tarah kaun tujh ko dekhega

jis tarah tujh ko dekhta hun main

mere lahje ke dard ko samjho

tujh ko jaane se rokta hun main

ab to 'asif' gae zamanon se

apne bare mein puchhta hun main