niyaz-e-ishq hai naz-e-butan hai

niyāz-e-ishq hai nāz-e-butāñ hai

mohabbat kā.enāt-e-do-jahāñ hai

hijābāt-e-ta.ayyun uTh rahe haiñ

nigāh-e-shauq terā imtihāñ hai

masarrat bhī baḌī ne.amat hai lekin

tire ġham se mujhe fursat kahāñ hai

na rahbar hai na jaada hai na manzil

nigāhoñ meñ ġhubār-e-kārvāñ hai

tire naqsh-e-qadam par chal rahā huuñ

ḳhudā jaane mirī manzil kahāñ hai

mirā zauq-e-siyah-kārī na pūchho

tumhāre hī karam kā imtihāñ hai

yahī shāyad hai takmīl-e-tasavvur

mujhe ḳhud par bhī ab un kā gumāñ hai

tum apne ġham kī azmat mujh se pūchho

tumhārā ġham hayāt-e-jāvidāñ hai

ye duniyā hai 'ra.īs'-e-soḳhta-jāñ

yahāñ har gaam par ik imtihāñ hai

niyaz-e-ishq hai naz-e-butan hai

mohabbat kaenat-e-do-jahan hai

hijabaat-e-tayyun uTh rahe hain

nigah-e-shauq tera imtihan hai

masarrat bhi baDi neamat hai lekin

tere gham se mujhe fursat kahan hai

na rahbar hai na jada hai na manzil

nigahon mein ghubar-e-karwan hai

tere naqsh-e-qadam par chal raha hun

KHuda jaane meri manzil kahan hai

mera zauq-e-siyah-kari na puchho

tumhaare hi karam ka imtihan hai

yahi shayad hai takmil-e-tasawwur

mujhe KHud par bhi ab un ka guman hai

tum apne gham ki azmat mujh se puchho

tumhaara gham hayat-e-jawidan hai

ye duniya hai 'rais'-e-soKHta-jaan

yahan har gam par ek imtihan hai