niyaz-e-ishq se naz-e-butan tak baat ja pahunchi

niyāz-e-ishq se nāz-e-butāñ tak baat jā pahuñchī

zamīñ kā tazkira thā āsmāñ tak baat jā pahuñchī

mohabbat meñ kahīñ ik rāz-dāñ tak baat jā pahuñchī

bas ab kyā thā zamāne kī zabāñ tak baat jā pahuñchī

zamāna taaḌ legā maiñ na kahtā thā ye ab samjhe

mujhe dīvāna kahne se kahāñ tak baat jā pahuñchī

nizām-e-maikada par tabsire aur hosh vāloñ meñ

yahīñ se azmat-e-pīr-e-muġhāñ tak baat jā pahuñchī

sunā ye thā ki chashmak bijliyoñ ko hai bahāroñ se

huā ye hai ki mere āshiyāñ tak baat jā pahuñchī

rah-e-manzil meñ ai rah rah ke himmat hārne vaale

ḳhabar bhī hai ki mīr-e-kārvāñ tak baat jā pahuñchī

niyaz-e-ishq se naz-e-butan tak baat ja pahunchi

zamin ka tazkira tha aasman tak baat ja pahunchi

mohabbat mein kahin ek raaz-dan tak baat ja pahunchi

bas ab kya tha zamane ki zaban tak baat ja pahunchi

zamana taD lega main na kahta tha ye ab samjhe

mujhe diwana kahne se kahan tak baat ja pahunchi

nizam-e-maikada par tabsire aur hosh walon mein

yahin se azmat-e-pir-e-mughan tak baat ja pahunchi

suna ye tha ki chashmak bijliyon ko hai bahaaron se

hua ye hai ki mere aashiyan tak baat ja pahunchi

rah-e-manzil mein ai rah rah ke himmat haarne wale

KHabar bhi hai ki mir-e-karwan tak baat ja pahunchi