niyaz-o-ijz mujhe naz-e-sang-e-dar se mila

niyāz-o-ijz mujhe nāz-e-sang-e-dar se milā

ba-qadr-e-zarf milā jo tirī nazar se milā

talāsh-e-manzil-e-maqsūd rā.egāñ na ga.ī

nishān-e-jāda-e-manzil rah-e-ḳhatar se milā

tire ḳhayāl-o-tasavvur kī shoḳhiyoñ kī qasam

ḳhirad ko jāma-e-vahshat tirī nazar se milā

supurd-e-barq-o-sharar kar ke āshiyān-e-vafā

payām-e-soz-e-tamanna tirī nazar se milā

bisāt-e-dahr ulaT dī nigāh-e-ulfat ne

koī ishāra jahāñ chashm-e-mo'atabar se milā

jahān-e-aish-o-masarrat pe muskurā.ūñgā

ġham-e-zamāna jo mujh ko tirī nazar se milā

had-e-yaqīñ meñ to ab aa ga.e ho ai 'māhir'

ḳhabar hai husn-e-takallum ye kis ke dar se milā

niyaz-o-ijz mujhe naz-e-sang-e-dar se mila

ba-qadr-e-zarf mila jo teri nazar se mila

talash-e-manzil-e-maqsud raegan na gai

nishan-e-jada-e-manzil rah-e-KHatar se mila

tere KHayal-o-tasawwur ki shoKHiyon ki qasam

KHirad ko jama-e-wahshat teri nazar se mila

supurd-e-barq-o-sharar kar ke aashiyan-e-wafa

payam-e-soz-e-tamanna teri nazar se mila

bisat-e-dahr ulaT di nigah-e-ulfat ne

koi ishaara jahan chashm-e-mo'atabar se mila

jahan-e-aish-o-masarrat pe muskuraunga

gham-e-zamana jo mujh ko teri nazar se mila

had-e-yaqin mein to ab aa gae ho ai 'mahir'

KHabar hai husn-e-takallum ye kis ke dar se mila