niyaz-o-naz baham ek hi manzil mein rahte hain

niyāz-o-nāz bāham ek hī manzil meñ rahte haiñ

ham un ke dil meñ rahte vo hamāre dil meñ rahte haiñ

vo jāneñ khelnā kyā mauj-e-tūfān-e-havādis se

jo tan-parvar bane ārām ke sāhil meñ rahte haiñ

amal darkār hai mumkin nahīñ kyā shai zamāne meñ

nihāñ parvāz ke par naqsh-e-āb-o-gil meñ rahte haiñ

shikasta hotā hai jibrīl kā par bhī jahāñ jā kar

ye putle ḳhaak ke vallāh us manzil meñ rahte haiñ

ḳhushī kā pesh-ḳhema un kā har ġham hai jo duniyā meñ

ġham-e-maujūd bhūle fikr-e-mustaqbil meñ rahte haiñ

'jalāl'-e-be-navā mushkil-pasand apnī tabī.at hai

isī baa.is ghire din raat ham mushkil meñ rahte haiñ

niyaz-o-naz baham ek hi manzil mein rahte hain

hum un ke dil mein rahte wo hamare dil mein rahte hain

wo jaanen khelna kya mauj-e-tufan-e-hawadis se

jo tan-parwar bane aaram ke sahil mein rahte hain

amal darkar hai mumkin nahin kya shai zamane mein

nihan parwaz ke par naqsh-e-ab-o-gil mein rahte hain

shikasta hota hai jibril ka par bhi jahan ja kar

ye putle KHak ke wallah us manzil mein rahte hain

KHushi ka pesh-KHema un ka har gham hai jo duniya mein

gham-e-maujud bhule fikr-e-mustaqbil mein rahte hain

'jalal'-e-be-nawa mushkil-pasand apni tabiat hai

isi bais ghire din raat hum mushkil mein rahte hain