niyaz-o-naz ke saghar khanak jaen to achchha hai

niyāz-o-nāz ke sāġhar khanak jaa.eñ to achchhā hai

tire mai-kash tire dar par bhaTak jaa.eñ to achchhā hai

sharāre soz-e-paiham ke bhaḌak jaa.eñ to achchhā hai

mohabbat kī hasīñ rāheñ chamak jaa.eñ to achchhā hai

sharāb-e-shauq ke sāġhar chhalak jaa.eñ to achchhā hai

fazā.eñ bāda-ḳhāne kī mahak jaa.eñ to achchhā hai

tire hañsne se kaliyoñ ke hasīñ rañg-e-tabassum meñ

ye qatre ḳhūn-e-armāñ ke chhiTak jaa.eñ to achchhā hai

numāyāñ haiñ sar-e-mizhgāñ jo māyūsī ke aalam meñ

vo aañsū tere dāman par Tapak jaa.eñ to achchhā hai

sar-e-bazm-e-mohabbat kaash un āñkhoñ ke darpan meñ

mohabbat ke hasīñ manzar chamak jaa.eñ to achchhā hai

sar-e-mai-ḳhāna saaqī aaj izn-e-ām ho jaa.e

tire mai-nosh pī pī kar bahak jaa.eñ to achchhā hai

mohabbat meñ mire betāb dil kī dhaḌkaneñ hamdam

tirī āġhosh meñ aa kar jo thak jaa.eñ to achchhā hai

mazāq-e-bāda-noshī tishna-e-ehsās hai saaqī

na.e andāz se sāġhar khanak jaa.eñ to achchhā hai

mohabbat meñ nahīñ mumkin pahuñchnā hadd-e-manzil tak

musāfir terī rāhoñ meñ bhaTak jaa.eñ to achchhā hai

numāyāñ hoñ na āñkhoñ se kahīñ ismat mohabbat kī

ye sho.ale dil ke dil hī meñ dahak jaa.eñ to achchhā hai

jo haiñ murjhā.ī kaliyāñ 'zeb' dāmān-e-gulistāñ meñ

havā ke ruḳh badalne se mahak jaa.eñ to achchhā hai

niyaz-o-naz ke saghar khanak jaen to achchha hai

tere mai-kash tere dar par bhaTak jaen to achchha hai

sharare soz-e-paiham ke bhaDak jaen to achchha hai

mohabbat ki hasin rahen chamak jaen to achchha hai

sharab-e-shauq ke saghar chhalak jaen to achchha hai

fazaen baada-KHane ki mahak jaen to achchha hai

tere hansne se kaliyon ke hasin rang-e-tabassum mein

ye qatre KHun-e-arman ke chhiTak jaen to achchha hai

numayan hain sar-e-mizhgan jo mayusi ke aalam mein

wo aansu tere daman par Tapak jaen to achchha hai

sar-e-bazm-e-mohabbat kash un aankhon ke darpan mein

mohabbat ke hasin manzar chamak jaen to achchha hai

sar-e-mai-KHana saqi aaj izn-e-am ho jae

tere mai-nosh pi pi kar bahak jaen to achchha hai

mohabbat mein mere betab dil ki dhaDkanen hamdam

teri aaghosh mein aa kar jo thak jaen to achchha hai

mazaq-e-baada-noshi tishna-e-ehsas hai saqi

nae andaz se saghar khanak jaen to achchha hai

mohabbat mein nahin mumkin pahunchna hadd-e-manzil tak

musafir teri rahon mein bhaTak jaen to achchha hai

numayan hon na aankhon se kahin ismat mohabbat ki

ye shoale dil ke dil hi mein dahak jaen to achchha hai

jo hain murjhai kaliyan 'zeb' daman-e-gulistan mein

hawa ke ruKH badalne se mahak jaen to achchha hai