niyat bhanpne ka hunar jaanta hai

niyat bhāñpne kā hunar jāntā hai

mirā yaar paḌhnā nazar jāntā hai

zabardastī anjān hai ban rahā vo

mirā hāl-e-dil sar-basar jāntā hai

pata to haiñ ādāb-e-ishq us ko lekin

haañ itnā hai kuchh muḳhtasar jāntā hai

baḌī ḳhūbiyoñ vaalā hai chārāgar vo

mudāvā-e-dard-e-jigar jāntā hai

mujhe bandagī kā sabaq mat paḌhāo

kahāñ jhuknā hai merā sar jāntā hai

akelā nikal kar huā qāfila ik

kuchh aisā vo fann-e-safar jāntā hai

har ik ġham kā andāz jaise jahāñ meñ

faqat merā hī ek ghar jāntā hai

shifāyāb kis kī duā se huā huuñ

ye rab yā duā kā asar jāntā hai

guzārī hai umr us ne be-ḳhauf ho kar

magar kaisā hotā hai Dar jāntā hai

niyat bhanpne ka hunar jaanta hai

mera yar paDhna nazar jaanta hai

zabardasti anjaan hai ban raha wo

mera haal-e-dil sar-basar jaanta hai

pata to hain aadab-e-ishq us ko lekin

han itna hai kuchh muKHtasar jaanta hai

baDi KHubiyon wala hai chaaragar wo

mudawa-e-dard-e-jigar jaanta hai

mujhe bandagi ka sabaq mat paDhao

kahan jhukna hai mera sar jaanta hai

akela nikal kar hua qafila ek

kuchh aisa wo fann-e-safar jaanta hai

har ek gham ka andaz jaise jahan mein

faqat mera hi ek ghar jaanta hai

shifayab kis ki dua se hua hun

ye rab ya dua ka asar jaanta hai

guzari hai umr us ne be-KHauf ho kar

magar kaisa hota hai Dar jaanta hai